Reportajen Umbelina dos Reis
Iha kampaña eleitorál Partidu Kmanek Haburas Unidade Nasional Timoroan (KHUNTO) ho númeru sorteiu 5 , kontinua hala’o nia kampaña polítika,iha Munisípiu Manatutu-Natarbota ba loron da-3 nian, ne’ebe foka liu ba dezenvolvimentu iha area rural, tanba KHUNTO nia razaun povu hein hela dezenvolvimentu.
Prezidente Partidu KHUNTO, Armanda Berta dos Santos liu hosi nia diskursu hateten, povu ne’ebé iha área rurais tempu barak mehi no hein dezenvolvimentu, liu hosi programa hirak ne’e sei hadi’a infraestrutura, edukasaun, kontinua apoiu bolsa da mãe ba jerasaun foun sira nia futuru, kria paz no estabilidade ba joven Timoroan hodi hatutan mehi eroi no eroiñas nian.
“Programa Partidu KHUNTO iha governu foun sei lori dezenvolvimentu ba Timoroan, kontinua hadi’a estrada, eskola, bolsa da mãe ba jerasaun foun iha futuru, hatutan eroi no eroiñas nian” dehan Prezidente Partidu KHUNTO Armanda Berta iha Postu Natarbora, Munisípu Manatutu, 23/04.
Iha parte sorin Konselleiru Nasional Amuzi Magno hateten, tinan 5 ona Partidu KHUNTO lori esperansa ba Timoroan hotu, esperansa hodi dignifika no hadi’a povu nia moris. “Loron ba loron, semana ba semana, fulan ba fulan, tinan ba tinan, la sente tinan 5 ona, agora tempu ona KHUNTO hadi’a povu nia moris ba naroman,” nia dehan.
Entretantu Jose dos Santos “Naimori Bucar” hateten, atu sai líder ne’ebé di’ak ba povu mak líder ne’ebé haburas rasa oi-oin, kria paz no estabilidade iha nasaun.
