Reportajen Joselina Dos Santos
Kampaña Eletorál Partidu Conselho Nacional Resistência Tomor (CNRT), iha Munisipiu Viqueque, hato’o sira nia programa polítika ne’ebe foka liu ba salva estadu de direitu demokrátiku no dezenvolvimentu liu-liu setór petrolíferu, edukasaun, saúde no funu hodi manan hasoru kiak no hasoru mukit.
Iha Kampaña Eleitorál ne’e, Prezidente Partidu Conselho Nacional Resistência Tomor (CNRT), Kay Rala Xanana Gusmão hateten osan ne’ebe iha Fundu Petrolíferu ne’e povu nian, tanba povu nia terus mak manan ukun aan, ne’e duni rikusoin ne’ebe iha Timor ne’e povu nian, tanba ne’e partidu Ida labele hasai povu nian rikusoin.
“Karik CNRT mak ukun, ha’u hakarak haree ba povu nia moris nomos haree ba Rai ne’e nia dezenvolvimentu, Nune’e hili CNRT iha buat rua primeiru importante tebes mak salva ita nia estado de direito democratico ne’ebe ita hili sala sei ba ditadura, no segundu atu harii dezenvolvimentu sé lae paradu”, Dehan Prezidente CNRT, Kay Rala Xanana Gusmão iha Kampaña Viqueque, Sexta 21/04.
Xanana hatutan husi tinan 2017 dezenvolvimentu lala’o, tanba ida ne’e husu ba joven no estudante sira prepara-an, tanba iha ekonomia ne’ebé sei diskute atu ema bele partisipa iha laran, hahú husi munisípiu to’o área rural, ida ne’e mak CNRT atu halo, tanba independénsia la signifika povu hetan bandeira ida Hino Nasional, maibe independensia tuir beiala no eroi sira nia mehi.
“Hadia rai ida ne’e no hadia povu nia moris, Partidu CNRT kontente tanba bele hetan konfiansa husi povu, sé simu konfiansa husi povu simu todan ida hanesan uluk ita la’o atu manan tan funu hasoru kiak no hasoru mukit lori dezenvolvimentu mai to’o iha área rural”, nia Dehan.
Nia husu ba joven sira ne’ebe iha ona esperiénsia katak, desentralizasaun sei hahú asembleia Munisipál deputadu husi Ossu, Governu Munisipál ho ninia osan, atu deputadu sira ba haree kona-ba saúde, doutór sira tenke ba hela besik povu atu povu moras karik asiste, edukasaun tenke to’o iha área rural la’os mai hotu sidade mak aluga uma (kost0 atu nune’e povu sente katak ukun-an ne’e iha valór no iha folin ba ema hotu.
