Reportajen Silvino Freitas
Governu Timor-Leste liuhusi Fundu Dezenvolvimentu Capital Humanu (FDCH) hala’o kooperasaun ho governu Estadus Unidus America (EUA) oferese bolsu estudu ba Timoroan hodi ba estuda iha America ho grau akadémiku mestradu.
Diretor FDCH, Cristovao dos Reis hateten liuhusi kooperasaun ne’e haruka Timoroan sira ba estuda iha estadus unidus, kooperasaun ne’e estudante sira sei selu husi balun FDCH no balun husi Estadus Unidus, no estudante sira ne’e sei hetan responsabilidade husi parte rua ne’e, ne’ebé sei kontinua sira nia estudu iha America.
“Planu ba inísiu nee estudante nain 2 mak sei aranka ba iha eskola iha America, dadaun iha hela prosesu selesaun dokumentu no rekrutamentu depois remata mak sira bele kontinua sira nia estudu iha America” dehan Cristovao iha FDCH Meeting Room “Knowledge Center” Dili, (05/05).
Nia dehan, atu hala’o estudu iha America tenke iha konesimentu ba lingua no siénsia ne’ebé aas, tanba sistema edukasaun iha America ne’e aas tebes, no estudante sira ne’ebé atu estuda iha America tenke iha preparasaun ne’ebé masimu nomós iha prosesu selesaun no rekrutamentu mós rigirozu tebes, nue’e prosesu estudu sei hahú iha tinan ida ne’e no hahú aula iha tinan 2024.
“Grau akdémiku ne’ebé sira atu estuda maka mestradu, sei iha tan kontinuasaun ba futuru tanba dadaun ne’e mak foin inísiu, hahú ne’e ho estudante na’in rua maibú ba iha planu maka haree, depende ba orsamentu no komunikasaun entre governu Timor Leste ho America no FDCH aloka orsamentu $150.000 ba estudante nain 2” nia dehan.
Fatin hanesan reprezentante embaixada America iha Timor Leste Tim Johnson dehan, akordu ida ne’e hodi fornese apoia finanséiru adisionál ba bolsa-estudu ensinu superiór ba durasaun tempu to’o tinan lima oin mai, liuhosi Fundu Dezenvolvimentu Kapitál Umanu, Timor-Leste sei kompromete maizumenus $150,000 iha tinan 2023 hodi fó apoia ba estudante Timoroan hamutuk na’in 2 hodi hala’o sira nia edukasaun ba nivél Mestradu iha Estadus Unidus liuhosi programa Fulbright no ho esperánsa katak fundu ne’e sei aumenta iha tinan haat nia oin mai tanba nasaun rua ne’e kontinua ho esforsu hodi habelár tan fornesimentu ba bolsa-estudu.
“Estadus Unidus sai ona Timor-Leste nia parseiru ba tempu naruk ne’ebé fornese bolsa-estudu ba Timoroan exellente sira hodi hala’o edukasaun no oportunidade ba programa interkámbiu iha Estadus Unidus, hola parte ba ami nia kompromisiu mak atu haburas parseria ida ne’e, ha’u orgullu ho ita nia esforsu konjunta ida ne’e ba fornese bolsa-estudu adisionál ba estudante Timoroan sira hodi hala’o edukasaun iha Estadus Unidus” dehan Tim Johnson.
Nia konklui katak, iha asina Memorandu Entendimentu iha tinan 2022 liubá, Estadus Unidus anúnsia katak sei habelar fornesimentu bolsa-estudu ba Timor-Leste, inklui fó fatin adisionál sia ba estudante Timoroan hodi hala’o edukasaun no peskiza iha Estadus Unidus no EUA nia estudante no bolseiru sira hodi mai hanorin no hala’o peskiza iha Timor-Leste no iha tinan 20 ikus ne’e nia laran, Estadus Unidus fó ona dalan ba povu Timoroan hamutuk 600 resin hodi hala’o edukasaun no tuir oportunidade programa interkámbiu sira, inklui liuhosi bolsa-estudu USTL, Fulbright, (Young Southeast Asian Leaders Iniviative) YSEALI no seluk tan.
