Reportajen Umbelina dos Reis
Eskola ensinu sekundáriu jeral 20 de Setembru Metinaro, sei menus profesores, fasildade eskola hanesan sala de aula, toilet, biblioteka, moru protesaun inklui seguransa eskolar nian.
Estudante husi eskola ESG 20 de Setembru total (711), profesores total (29), entre profesores sira ne’e balun kaer materia rua, maibe espesialidade ba materia quimica too ohin loron laiha profesores. Rekomenda ba parte relevante bele hadi’a fasildade eskola nian, Urjentemente prioridade ba moru protesaun eskola nian, nune’e ita bele hadi’a labarik sira nia futuru.
Diretor Ezekutivu Ensinu Sekundáriu Jeral 20 de Setembru Metinaro, Alfredo Soares Ximenes hateten, fasildade eskola nian ne’ebe estudante sira ezije ne’e loos katak sala de aula la sufisiente nune’e estudante sira fahe ba turnu rua, dader no lokraik tanba estudante hamutuk 711. Kada iha sala de aula estudante hamutuk 40 resin, maibe tuir lo-loos ne’e estudante iha sala de aula ema nain 30 resin deit, maibe problema kondisoes sala de aula menus entaun tenki sulan hamutuk deit, tanba sala de aula iha ne’e hamutuk (9), deit.
“Fasildade sira ne’e iha ona oituan-oituan maibé estudante barak demais entaun uza ladun kuida sasan sira ne’e ho di’ak no balun estraga hotu, maibe konaba biblioteka no sala de aula ami halo ona proposta desde tinan kotuk maibe laiha resposta husi parte relevante. Maibe karik orsamentu mak iha ami bele aumenta tan sala de aula, nune’e estudante sira bele asesu ba aprendizajen ho diak.” Dehan Diretor ESG 20 de Setembru Metinaro, Alfredo Soares Ximenes, ba Neon Metin, iha eskola Metinaro, sexta-feira, 27/03.
Nu’udar Diretor da eskola hamutuk ho profesores sempre fo hanoin ba estudante atu kuida no hadomi sasan sira ne’e hanesan ita nia an rasik, maibe estudante mak laiha konsiénsia ne’e ita halo oinsá, labarik sira ne’e boot hotu ona, se ita baku ka ko’alia makaas lei kondena nune’e dau-daun ne’e profesores sempre iha posisi ne’ebe sala hela deit.
” Rede ne’ebe ami halo haleu eskola ne’e uza deit osan eskolar tinan kotuk nian, maibe laiha ema ruma ka kompaiña ruma mai dehan atu halo moru protesaun ba eskola ne’e.
Nia konklui, Estudante iha eskola ensinu sekundáriu jeral 20 de Setembru Metinaro total hamutuk (711), profesores feto nain (8), mane (21), total hamutuk (29), entre profesores sira ne’e balun lori materia rua tanba profesores menus, espesialmente ba materia quimica ne’e profesores laiha durante tinan naruk nia laran, nune’e dala-ruma profesores matematika nia mak ajuda hanorin fila-fali maibe espesialidade ne’e laiha.
Iha fatin hanesan estudante Cresencio da Costa hateten, nia agradese bele eskola iha ne’e hodi tuir aprendizajen ho diak, maibe dala-ruma mos sente triste tanba haree ba fasildade eskola nian hanesan sala de aula, menus profesores, toilet no moru laiha.
” Dala-ruma hau haree fasildade eskola nia sente triste liu-liu ba haris sira ne’e tanba dala-ruma ami estudante barak demais atu ba haris fatin hein malu entaun kolega sira ne’ebe koñese diak komunidade sira ne’ebe hela besik eskola ne’e sira nia kabun moras tenki halai fila, maibe ami ne’ebe moe no tauk ne’e tenki asesu ba haris fatin eskola nia hodi hein malu. Nune’e laiha moru protesaun eskola kolega balun mai tarde haksoit liu arame, balun hakarak bolos mos haksoit liu arame deit, dala-ruma balun halai sai husi eskola kotuk tanba tau kalen deit, laiha seguransa eskola nia hodi kontrola” Nia espresa.
Nia rekomenda, karik nain ulun sira husi parte relevante rona ami nia lian karik bele tau orsamentu hadi’a ami nia moru protesaun eskola nian, fasilidades eskola nian inklui seguransa ba eskola refere tanba ami foinsa’e mak futuru ba nasaun nian.
