Reportajen David da Costa
Iha Aniversáriu Polísia Nasionál Timor-Leste (PNTL) ba dala-XXVI no posse bá Komandante Jerál PNTL foun, Komisáriu Assistente Polisia Afonso dos Santos ho Segundu Komandante PNTL foun, Komissária Assistente Natércia Eufrásia Soares Martins, Primeiru Ministru (PM), apela bá membru tomak iha Instituisaun PNTL at halo atuasaun bá problema ruma iha terrenu tenke hatudu profisionalizmu no servisu makaas atu bele assegura estabilidade nasionál.
Primeiru-Ministru (PM), Kay Rala Xanana Gusmão, fó parabéns bá PNTL tanba ohin loron halo ona tinan-26. Tenke fó parabéns mós bá servisu di’ak hosi eis Primeiru komandante Henrique da Costa no Segundu Komandante Pedro Belo.
Nune’e mos nia sita diskursu Primeiru Komandante ne’ebé haktuir hosi kedan bainhira PNTL hahú to’o ohin loron, nia mós presta omenajen bá komandante PNTL sira ne’ebé ho sira nia servisu, dedikasaun mak ohin loron ema hotu bele hamrik iha ne’e.
Tanba ne’e bainhira polísia sira halo atuasaun ba problema ruma tenke ho profisionál, atu nune’e sidadaun sira sei tau konfiansa nafatin ba iha instituisaun PNTL.
“Povu tomak fiar katak imi ajente polísia hamutuk ho iminia komandante na’in-rua, ita hamutuk asegura estabilidade iha ita-nia rain, hodi povu bele fiar katak nia bele moris sein preokupasaun kona-bá seguransa tanba iha polísia ne’ebé iha sira-nia kotuk atu ajuda,” dehan Primeiru Ministru Kay Rala Xanana Gusmão iha Palásiu Governu, Sexta 27/03.
Nia haktuir, loos duni tinan ida ne’e iha fulan-Maiu 2026 Timor-Leste sei halo tinan-24 iha ne’ebé kaer rasik kuda talin. Sai hosi konflitu naruk teb-tebes, tinan 24 to’o hetan tiha ukun a’an. Tinan ida ne’e tinan ida ne’ebé apropriadu tebes, oportunu tebes atu halo reflesaun ida kona-bá 2002 – 2026.
Ohin Komandante Jerál, Afonso dos Santos temi ona saida mak atu hadi’a reforsa tán PNTL. Loos duni bá nasaun rasik mós buka atu deskobre, haree saida mak halo di’ak, saida mak halo a’at, hodi bele kurije, hodi bele konsolida Estadu Direitu Demokrátiku.
“Tanba ida ne’e tinan rua nulu liu restaurasaun ukun an maibé ita hotu assume kompromisu katak ita tenke hadi’a di’ak liu-tán PNTL,” nia dehan.
Tanba ne’e, relasaun entre polísia ho komunidade tenke amizade la’ós baku arbiru, ameasa arbiru, komunikasaun ida ne’e mak persiza iha. Tenke haree bá fronteira, buat oin-oin. Tanba ne’e maka husu bá Komandante Jerál tuir de’it saida mak dehan rasik ona, buka atu halo koordenasaun ne’ebé di’ak liu iha seitór hotu-hotu kona-bá planu PNTL nian.
“Ohin loron mundu enfrenta hela situasaun defísil, funu iha Iraun no impaktu to’o daudaun ona mai Timor, maibé senti katak sei la todan liu hanesan iha rai seluk seluk. La hatene funu ne’e bainhira mak hotu no problema sei mai nafatin tán. Ne’e duni PNTL tenke prepara a’an, prepara kondisaun hodi ita bele asegura estabilidade iha rai ne’e,” nia hatete,
Nia esplika, Timor foin hahú prosesu ida ne’ebé la fásil, la defísil, komplexu ida kona-bá integrasaun bá ASEAN. Tanba ne’e maka iha rezolusaun Governu hato’o bá Komandante Jerál atu haree seguransa rai ne’e nian, haree bá oinsá bele asegura estabilidade iha rai ne’e. Bá Segundu Komandante bele haree fali bá kooperasaun internasionál kona-bá integrasaun iha ASEAN.
Nu’udár membru foun ASEAN, PNTL mós sei kumpri devér tuir saida mak fó ona, labele halimar tanba nu’udár membru foun PNTL bele responde ezijénsia sira hosi ASEAN katak iha 2027 iha eleisaun Prezidensiál, 2028 eleisaun Parlamentár no 2029 Prezidénsia ASEAN ninian.
“Tanba ida ne’e povu hein PNTL bele responde bá situasaun difísil ne’ebé sei mai ho di’ak, ho hotu-hotu nia dedikasaun maibé mós respeitu bá direitus umanus. Ami hotu fiar katak ho reforma institusionál, ho korresaun ne’ebé hala’o daudaun hodi bele presta omenajen bá imi-nia servisu ne’ebé fundamentál tebes bá estabilidade nasaun nian ami fiar katak imi mós bele konfia povu,” tenik nia.
Iha fatin hanesan Komandante Jerál Polisia Nasional Timor-Leste (PNTL) foun, Komissáriu Assistente Polisia Afonso dos Santos, hato’o kompromisu atu hala’o misaun ida ne’e ho haraik-an, maibé mós ho konsiénsia tomak kona-bá responsabilidade ne’ebé tau iha kabaas, iha servisu bá Estadu no bá povu Timoroan.
Nune’e mos iha nível rejionál no internasionál, Komandante na’in-rua sei hametin nafatin kooperasaun ho parseiru sira, liuliu iha ámbitu ASEANAPOL, ASEAN, CPLP, TLPDP no organizasaun internasionál sira seluk, promove troka informasaun no reforsu kapasidade institusionál sira.
