Reportajen David da Costa
Iha Aniversáriu Polísia Nasionál Timor-Leste (PNTL) ba dala-XXVI no posse bá Komandante Jerál PNTL foun, Komisáriu Assistente Polisia Afonso dos Santos ho Segundu Komandante PNTL foun, Komissária Assistente Natércia Eufrásia Soares Martins, Hato’o sira nia misaun katak atu garante seguransa interna, orden publiku no protesaun ba sidadaun sira hotu.
Komandante Jerál Polisia Nasional Timor-Leste (PNTL) foun, Komissáriu Assistente Polisia Afonso dos Santos, hatete, Importante atu reafirma, ho klaru, katak Polísia Nasionál Timor-Leste la’ós, no labele sai, instrumentu polítiku ida. PNTL nu’udár instituisaun la partidária Estadu nian, iha servisu Konstituisaun no lei nian iha área Seguransa nian.
“Ami nia misaun mak atu garante implementasaun polítika sira Governu nian iha ámbitu seguransa nian, hodi garante seguransa interna, orden públika, no protesaun ba sidadaun hotu-hotu, lahó distinsaun. Ida ne’e maka prinsípiu universál ne’ebé orienta forsa polísia modernu no profisionál sira hotu,” dehan Komandante Jerál PNTL foun, Komissáriu Assistente Polisia Afonso dos Santos, bainhira hato’o nia diskursu iha Palasiu Governu sexta 27/03.
Nia konta iha istória PNTL nian mak istória ida ne’ebé naruk, kompleksu, marka ho sakrifísiu no dezafiu sira ne’ebé signifikativu. Hosi períodu administrasaun tranzitória Nasoens Unidas nian, iha Superintendente Paulo de Fátima Martins nia lideransa, to’o momentu difísil krize polítika ne’ebé rai ne’e hasoru, PNTL hatudu reziliénsia no kapasidade bá adaptasaun no reforma.
Hafoin krize polítika ida ne’e, intervensaun Nasoins Unidas nian dala ida tán assume papél desizivu ida iha kontrollu no reorganizasaun forsa polísia nian, iha kontestu ida ne’ebé partikularmente koñesidu nu’udár Akordu Suplementár.
Iha faze difísil ne’e mak Komandante Longuinhos Monteiro kaer lideransa, ho misaun klaru atu konsolida instituisaun no garante koordenasaun efetivu entre forsa Estadu no UNPOL (Gabinete Seguransa Públika Nasoens Unidas).
Iha de’it tinan rua, ho determinasaun no vizaun estratéjiku, Komandante Longuinhos konsege konsolida, reestrutura, no restaura misaun primária PNTL nian kona-bá kontrolu totál bá operasaun polísia nian iha Timor Leste.
Nune’e, iha tinan 2012, iha nia lideransa, PNTL asume tomak mandatu totál bá misaun polísia nian, hodi marka momentu istóriku ida ne’ebé kontribui ho desizivu bá polítika Governu nian atu hakotu misaun Nasoins Unidas nian iha Timor Lorosa’e.
“Ami, ofisiál PNTL sira ne’ebé prezente iha ne’e, rekoñese katak la’ós prosesu ida ne’ebé fásil, maibé susesu, rezultadu hosi esforsu koletivu no kompromisu institusionál ne’ebé lidera hosi Komandante Longuinhos,” nia hateten.
Tuir mai, Komandante Jerál sira seluk kontinua dalan ida ne’e, maka Komandante Júlio Hornay, Komandante Faustino, no, foin lalais ne’e, Komandante Henrique da Costa. Ida idak, iha sira nia tempu, asume responsabilidade fundamentál iha konstrusaun no konsolidasaun PNTL nian to’o ohin loron.
Nia esplika, tanba ne’e Komandante foun na’in-rua halo ona kompromisu metin atu kontinua prosesu harii PNTL ida-ne’ebé sai sólidu bá beibeik, profisionál, la’ós partidáriu no orientadu bá rezultadu ne’ebé bele hatán bá dezafiu atuál no futuru seguransa nasionál nian.
Tanaba ne’e iha primeiru tau prioridade estratéjiku sira, Komandante na’in rua destaka reforsu profisionalizmu no disiplina institusionál liu hosi formasaun kontínua, promosaun étika no integridade no luta firme hasoru kualkér forma indisiplina nian iha PNTL nia laran.
Segundu, modernizasaun instituisaun nian, ho investimentu iha teknolojia, hametin investigasaun kriminál no dezenvolve kapasidade espesífika sira, partikularmente iha kombate ba krime transnasionál, konstitui ameasa ida ne’ebé bo’ot liu ne’ebé mosu ohin loron.
Terseiru, hametin polisiamentu komunitáriu, promove relasaun konfiansa ho komunidade sira, ne’e esensiál bá prevensaun krime no estabilidade sosiál.
Kuartu, intensifika koordenasaun inter-institusionál, reforsa ligasaun ho F-FDTL (Forsa Defeza Timor-Leste), Ministériu Públiku, PCIC (Polísia Investigasaun Kriminál) no servisu intelijénsia estadu nian, atu nune’e bele garante resposta ida ne’ebé integradu no efikás bá ameasa sira seguransa nasionál.
Atu nune’e PNTL tenke garante koordenasaun ne’ebé efetivu no permanente ho servisu estadu nian hotu-hotu, hodi promove koordenasaun institusionál ne’ebé sólidu ne’ebé fó dalan ba resposta integradu ba dezafiu seguransa nasionál.
Tanba ne’e, sentidu responsabilidade, katak interese superiór sira seguransa estadu nian tenke prevalese liu kualkér interese institusionál ka setoriál, orienta nafatin asaun sira ho prinsípiu interese nasionál nian.
Iha nível rejionál no internasionál, Komandante na’in-rua sei hametin nafatin kooperasaun ho parseiru sira, liuliu iha ámbitu ASEANAPOL, ASEAN, CPLP, TLPDP no organizasaun internasionál sira seluk, promove troka informasaun no reforsu kapasidade institusionál sira.
