Reportajen Santina Lucia da Costa
Primeiru Ministru (PM), Taur Matan Ruak, hateten Orsamentu Retifikativu (OR) Governu tau $50 milloens atu bele ajuda banku sira fó kreditu funan ki’ik ba Empreza sira hodi dalan emprezáriu sira ba setór produtivu liu-liu Agrikultura.
Ba jornalista sira, Primeiru Ministru, Taur Matan Ruak, informa, Ita boot sira hatene, foin dadauk Orsamentu Retifikativu ne’e tau $50 Milloeñs para ajuda Banku sira fó kreditu funan ki’ik ba ita nia emprezariu sira, hodi dalan emprezariu sira ba setór produtivu liuliu agrikultura.
“Ne’e pasu ida importante, se ita boot sira haree didi’ak durante tempu ne’e, ita nia sidadaun, familia sira maka konsentra iha agrikultura, emprezariu sira barak iha serbisu no mós insfranstrutura.” Dehan, PM, Taur Matan Ruak, hafoin enkontru ho Xefe Estadu iha Palasiu Prezidensial Nicolau Lobato, Bairu-Pite, Dili, 26/5.
Taur Matan Ruak hatutan entaun ne’e pasu ida importante, ita komesa fó ba iha setór agrikultura, sá tan tempu hanesan ne’e depende ba sasán nia presu sa’e.
“Ita konsumu ita nia foos iha rai laran, 135.000 toneladas, agora produz de’it 72.000 toneladas, sé ita kobertura produsaun ne’e aumenta halo kobertura ne’e di’ak liu, tanba ita nia osan la sai ba liur, sirkula de’it iha ne’e.” Afirma, Xefe Governu.
Nia esplika, Mina folin sa’e, dadaun ita iha mina Nú produsaun iha Lospalos, produsaun Batar atu halo mina, Kamí, Baulina iha Baucau. Sé ita aumenta produsaun ki’ikoan iha rai laran, la’os subtitui mais taka dadaun importasaun ne’ebé ita halo, signifika osan fila ba ita nia inan-aman sira. Se ita la halo produsaun osan ne’ebé iha ne’e ba fali produtór ne’ebe rai seluk nian.
“Governu halo hela esforsu ida ne’e, horseik ami halo primeiru reuniaun komisaun interministerial ne’ebe tau matan ba kadiadu valór, hahú husi produsaun to’o iha konsumu, hau mak lidera, entaun ami serbisu maka’as para oinsa maka ita nia setór produtivu liuliu agrikultura, peskas, pekuaria no area sira seluk.” hateten Taur.
