Reportajen Santina Lucia da Costa
Primeiru Ministru (PM), Taur Matan Ruak hasoru malu ho Prezidente Republika (PR), Dr. José Ramos Horta, hodi koalia kona-ba seguransa no atividade governu nian liuliu ba Parlamentu Nasional (PN) iha tempu badak.
“Primeiru enkontru semanal ho Prezidente Republika, Dr. José Manuel Ramos Horta, no briefing uituan kona-ba seguransa no atividade governu nian liuliu ba Parlamentu Nasional iha tempu badak hodi depende opsoens planu.” Hateten, Primeiru Ministru, Taur Matan Ruak, hafoin enkontru ho Xefe Estadu iha Palasiu Prezidensial Nicolau Lobato, Bairu-Pite, Dili, 26/5.
Xefe Governu akresenta uluk governu lori opsaun rua de’it ba Parlamentu Nasional, ida maka Planu Governu nian no PN aprova, rua tinan-tinan Governu lori orsamentu ba. Agora ho lei, enkuadramentu jestaun finanseira foun obriga Governu antes lori Orsamentu ba lori uluk planu, entaun normalmente planu akontese iha Fulan Maiu nia laran.
“Hau informa ba Prezidente Republika, tempu badak ami sei ba PN, agora membru Governu sira balun ba uluk ona, no tempu badak ami sei ba aprezenta programa iha PN hodi aprova, mais tarde promulgasaun Prezidente Republika, depois de ida ne’e ami prepara fali orsamentu, para tempu orsamentu ami hodi fali ba PN.” Dehan Taur Matan Ruak.
Taur haktuir Prezidente Republika, Dr. Ramos Horta nia prioridade oinsa atu kombate má-nutrisaun no mós hamlaha iha ita nia rai.
“Governu intende ida ne’e, halo esforsu informa dadauk atividade ne’ebé halo hela, Governu mos nafatin serbisu ho Gabinete Prezidente Republika nian, para oinsa akumula ideias sira ne’e.” Realsa Taur mais antes de ida ne’e Membru Governu balun sei mai informa situasaun ba Prezidente Republika, antes inisiativa sira seluk avansa ba oin, liuliu orsamentu 2022 nian.
Entretantu, iha oportunidade ne’e mós, Primeiru Ministru, Taur Matan Ruak, fó parabens ba jornalista sira no povu Timor-Leste ba festa aniversariu 20 Maiu ba dala-20 no mós tomada de posse ba Atúal Prezidente Republika, Ramos Horta, serimonia la’o ho di’ak.
“Hau hakarak lori Governu nia naran no hau nia-an rasik agradese ba ita boot sira no ita nia populasaun tomak.” tenik Taur.
