Reportazen Raimundo Seguerau
Sekretariu Estadu Komunikasaun Sosiál (SEKOMS), Mericio Juvinal dos Reis Akara hateten, implementasaun estadu emerjensia faze datoluk, sei la hanesan ho faze primeiru no segundu tanba faze datoluk ne’e sei konsentra de’it ba iha fronteira terestre, aereo no tasi.
Reprezentante Governu hatoo iha Parlamentu Nasional katak razaun fundamental ba governu hodi husu ba Parlamentu Nasional (PN) atu halo extensaun ba Estadu Emerjensia (EE) ne’e tanba Timor-Leste sei iha problema kona-ba infra-estrutura no ekipamentu sira.
“Estadu Emerjensia ne’ebé ita propoin ne’, nia regra sei lamakas hanesan faze primeiru no segundu, ita sei konsentra makas ba iha taka fronteira trestre, tasi, lalean”, dehan Mericio iha plenaria PN, Dili, tersa (26/05).
Ho nune extensaun estadu emerjensia ne’e fó espasu di’ak liu ba estadu no governu atu luta kontra Covid-19 tanba bele kontrolu di’ak ba populasaun sira nia movimentasaun sira iha rai laran.
Pandemia Covid-19, tuir relatoriu Organizasaun Saude Mundial (OMS) identifika ona katak, Covid-19 sei la lakon no iha posibilidade atu ataka fila fali populasaun sira iha mundu inklui Timor-Leste no sei makas liu tan tanba ita seidauk iha aimoruk.
“Ita kontente, ita orgullu, ita laiha moras ne’e, maibé ita lebele haluha katak virus ne’e sei iha, realidade ita nia nasaun vizinu mak hetan kazu makas los. Iha NTT besik los ita, ita tenke prevene nafatin ita nia nasaun para virus ne’e labele mai iha ita nia rai”, nia afirma.
Relasiona esplikasaun ne’e, Deputadu Bankada FRETILIN, Fálvio Maria G. da Silva hateten, konkorda ho governu nian hanoin hodi extende estadu emerjensia ba faze datoluk ba iha munisipiu tolu hanesan Bobonaro, Covalima no RAEOA tanba sira mak fronteira ho Indonesia.
“Hau husu ba iha governu bele extende tan dala ida estadu emerjensia Timor-Leste, maibé fo fleksibilidade ba ita nia povu atu bele halo sirkulasaun. Iha ne’e liu-liu fronteira terestre tenke taka nafatin”, nia sujere.