Reportajen Umbelina dos Reis
Eskola ensinu sekundáriu Jeral 20 de Setembru Metinaro, sei menus profesores, fasildade eskola hanesan sala de aula, toilet, biblioteka, moru protesaun inklui seguransa eskolar nian.
Estudante no Diretor sira iha eskola refere preokupa tebes ho Toilet ne’ebe la dun seguru ba estudante feto sira.
Bainhira Neon Metin visita eskola 20 de Setembru iha Metinaru, Diretor Ezekutivu Ensinu Sekundariu Jeral, Alfredo Ximenes hateten, fasildade toilet eskola nian, profesores sira nia ketak, estudante feto no mane sira nian ketak, maibe toilet ba mane sira nia mak aat ona, dau-daun ne’e feto no mane uza hamutuk toilet ida deit.
Nia dehan fasildade eskola nian sira preokupasaun teb-tebes, tanba toilet balun aat ona ,no sala de aula sei menus inklui moru protesaun eskola nia too ohin loron seidauk halo ho diak.
” Ami laos preokupa ba toilet no sala de aula deit, maibe preokupasaun boot liu maka moru protesaun, tanba moru ne’e importante tebes atu asegura ba estudante sira ne’ebe tama ona eskola laran, labele sai fila-fali ba liur.” Nia dehan.
Nia dehan tan, nudar Diretor Eskola laos hare deit ba serbisu, maibe hare mos problema haris fatin,
“fatin foer demais ona, hau kuru bee fase moos maibe estudante barak demais, dala-ruma feto oan sira mak ba haris fatin kuru-bee lori ba, maibe mane oan sira ne’e ba haris fatin la lori bee, entaun haris fatin kontinua foer, tanba estudante balun laiha konsiénsia hodi kuida ba sasan sira ne’e.” Dehan Alfredo.
Nu’udar Diretor da eskola hamutuk ho profesores sempre fo hanoin ba estudante atu kuida no hadomi sasan sira ne’e hanesan ita nia an rasik, maibe estudante mak laiha konsiénsia ne’e ita halo oinsá, labarik sira ne’e boot hotu ona, se ita baku ka ko’alia makaas lei kondena nune’e dau-daun ne’e profesores sempre iha posisi ne’ebe sala hela deit.
Iha fatin hanesan estudante Nilvia Soares hateten, ami nia preokupasaun ba iha eskola ida ne’e mak hanesan primeiru sala de aula sei menus, segundu toilet ba feto no mane nia keta-ketak, maibe dau-daun nee mane sira nia aat ona, nune’e ami uza hamutuk deit.
“Toilet ne’ebe kolega mane sira nia aat ona ne’e, ami hakarak rekomenda ba parte relevante sira se bele haree ba kondisoes sira ne’e, tanba ami eskola iha ne’e estudante barak demais uza haris fatin ida hamutuk ne’e la sufisiente, tanba tinan hira ba kotuk ami rona husi kaka sira dehan ba haris fatin karik kuidadu, tanba feto mane uza hamutuk deit, dala-ruma mane sira hafuu fali ita ne’e akontese iha tinan hira ba kotuk, maibe ami nia tempu ida ne’e seidauk akontese hanesan ne’e, nune’e ami hakarak anticipated ne’e hadi’a ami nia toilet agora.” Dehan Nilvia
Iha fatin hanesan estudante Cresencio da Costa hateten, nia agradese bele eskola iha ne’e hodi tuir aprendizajen ho diak, maibe dala-ruma mos sente triste tanba haree ba fasildade eskola nian hanesan sala de aula, menus profesores, toilet no moru laiha.
” Dala-ruma hau haree fasildade eskola nia sente triste liu-liu ba haris sira ne’e tanba dala-ruma ami estudante barak demais atu ba haris fatin hein malu, entaun kolega sira ne’ebe koñese diak komunidade sira ne’ebe hela besik eskola, sira nia kabun moras tenki halai fila, maibe ami ne’ebe moe no tauk ne’e tenki asesu ba haris fatin eskola nia hodi hein malu”, dehan Crensensio
Nia rekomenda, karik nain ulun sira husi parte relevante rona ami nia lian karik bele tau orsamentu hadi’a ami nia moru protesaun eskola nian, fasilidades eskola nian inklui seguransa ba eskola refere tanba ami foinsa’e mak futuru ba nasaun nian.
Estudante iha eskola ensinu sekundáriu jeral 20 de Setembru Metinaro total hamutuk (711), profesores feto nain (8), mane (21), total hamutuk (29)
