Reportazen Francisco JDA no Bernarda da Costa
Relasiona ho desizaun governu hodi kontinua aplika Serka Sanitaria iha Dili, fo impaktu makaas ba neseidade bazika liu-liu ba estudante sira ne’ebé mai hosi municipio no hela iha kos ka aluga uma hodi hela, tanba estudante sira ne’e la bele halo movimentasaun inklui no susar ba sira atu hetan osan hosi inan aman sira ne’ebe hela iha municipio seluk.
Hafoin Parlamentu Nasionál deskute ho governu liu hosi plenaria, Deputada Bankada Partidu Demokratiku (PD), Elvina Sousa iha intervensaun hateten katak, problema barak akontese durante lockdown, fo impaktu boot ba estudante sira ne’ebé mak hela iha kos iha Dili, susar tebes atu selu osan ba kost no buka hahán.
“Ha’u hanoin katak Lockdown ne’e ba iha impaktu ba estudante sira ne’ebé mak hela iha Dili laran, liu-liu hela iha kos, sira dook hosi familia, inan aman, iha tempu ida agora ne’e sira susar tebes atu selu sira nia kos no buka hahán ba sira nia an rasik, atu bele sustenta sira, kada loron iha tempu ne’ebé difisil tanba barak mak inan aman la’ós hanesan funsionariu públiku, maibé depende ba rendimentu lor-loron nian, iha atividade barak suspende, ida ne’e mós fo impaktu ba inan aman nia rendimentu, husu ba governu buka meius fo asistensia ba estudante sira ne’ebé mak hela iha kos ka hela dook no mesak hosi inan aman sira,” hateten Deputada Elvina Sousa, iha PN, 16/03
Hanoin hanesna hosi Deputada Bankada KHUNTO, Olinda Guterres iha intervensaun hatete katak, estudante sira ne’ebé hela iha Dili, dook hosi inan aman, tanba ne’e husu ba governu oinsá mak bele rezolve estudante sira nian hahán.
Iha situasaun ne’e Neon Metin dadalia ho estudante Humberto Noronha husi Covalima ne’ebe preokupa tebes ho situasaun ne’e tamba familia la bele haruka osan no hahan ba sira, tamba sira nia nesesidade loron-loron depende deit ba inan aman sira iha foho.
“Hau eskola iha Dili hela iha uma aluga (kos) no uma nain ezije ona hau atu selu maibe osan laiha, no dook husi familia tomak, famila hela hotu iha munisipiu Covalima no nesesidade loron-loron tau fiar deit ba familia sira iha Covalima, maibe ho estadu emergensia familia sira atu haruka osan mai ladiak,” dehan Humberto iha Kaikoli.
Nia husu ba governu atu hare problema sira ne’ebe mak sira infrenta, hodi buka netik alternativu balun, “ajuda netik ami atu nune’e bele rezolve netik ami nia nesesidade durante iha situasaun EE nia laran”.
Iha parte sorin estudante Alsina Pires Amaral konfesa katak liga ho situasaun EE ne’ebe mak governu hatur maka ami estudante sira husi Covalima ne’ebe hela iha Dili preokupa liu ba osan tanba presiza tebes atu bele ajuda nesesidade loron-loron.
“Ami nia familia la haruka osan mai, entaun meius ne’ebe ami uza hodi halo maka empresta vizino no kolega sira nia osan, atu nune’e bele satan netik ami nia nesesidade loron-loron”, haktuir Alsina.
