Reportajen Silvino Freitas
Resisténsia Nasionál Estudante Timor Leste (RENTIL) hala’o observasaun direta ba eleisaun parlamentár 2023 nune’e identifika iha naksalak balun ne’ebé presiza hadi’a, nune’e mós providu ba involvementu labarik idade minoridade iha prosesu kampaña eleitorál tanba iha risku ne’ebé bo’ot bainhira mosu konfrontu ruma.
Koordenadór Jerál Observadór Elpar 2023 RENETIL Natalina Lidia Aparicio “Rara” hataten durante eleisaun parlamentar RENETIL hateten, iha prosesu eleisaun parlamentár polin-staff sira laiha entendimentu ne’ebé di’ak ba materiál sensetivu no la sensetivu nune’e mós la entende di’ak hodi haruka observadór sira vota tuir sira unidade geographica eleitorál nian.
“Iha prosesu kontajen votus fatin balun brigada sira la konsege halo verifikasaun ba dadus sira ne’ebé iha, hanesan totál votante la halo konfirma ho dadus ne’ebé iha hodi sura votu nulu ba validu, maibé ikus mai konsege rezolve, tanba ne’e polin-staff sira maka tenke tau atensaun masimu” dehan Rara liuhusi konferénsia imprensa iha sede RENETIL Palapasu Dili, (19/06).
Tuir Rara katak, wainhira iha loron eleisaun partido polítika balun nafatin uza atributo ba iha sentru votasaun, nune’e mós iha sentru votasaun balun la fó sai totál votante sira entre feto no mane, to’o kontajen remata mós sira la fó sai totál votante feto no mane.
Entretantu sekretáriu jerál RENETIL Joaquim Fonseca Rusuo salienta katak, iha RENETIL nia observasaun ne’e sakat hela uituan maibé éspera katak ba futuru bele hadi’a, nune’e mós fatin balun observasaun RENETIL la hetan autorizasaun atu vota fatin ne’ebé hala’o observasaun maibé RENETIL koopera ho STAE hadi’a hikas problema refere, hodi permiti sira vota movel tuir kolokasaun membru observador sira.
“Kampaña la tuir oráriu ne’e mak partido sira halo hotu maibé ita bolu kedan atensaun kedan, ida tan bolu atensaun ne’e mak involve minoridade sira, tanba sira seidauk direitu votu no la’ós emansipadu, ita sorte iha eleisaun ida ne’e laiha violénsia boot, RENETIL rejista violénsia fizika ligadu ho eleisaun ne’e dala ida de’it, ida iha Dili maibé ikus mai verfika katak laiha ligasaun ho kampaña no eleisaun, tanba ne’e eleisaun ne’e risku boot tebes bainhira lori labarik sira iha kampaña sira” konklui Sejen Rusuo.
