Reportajen Silvino Freitas
Liuhusi semináriu ho tema “hamutuk ho frente urbana ita tau lesuk hanoin ba polítika dezenvolvimento nasionál hodi lori moris di’ak ba povu” oradór Nivio Magalhaes hateten, estadu Timor Leste presiza hanoin atu loke kampu traballu iha rai laran no labele depende liu atu haruka traballadór ba nasaun seluk, kria mós kondisaun atu nune’e sira fila bele kria rasik negosiu tuir esperénsia saida mak sira aprende iha nasaun seluk.
Tuir Nivio, bainhira iha dezempregu aas bele kontribui ba problema iha sosiedade nia laran tanba ne’e presiz iha diversifikasaun ekonomia no kria kampu traballu nune’e mós haree fali kualidade edukasaun sira hodi bele garantia kualidade di’ak ba joven sira.
“Tempu badak Timor Leste adere ba ASEAN iha adezaun ne’e iha kompetisaun ne’ebé as tebes, tanba sei nakloke mós ba traballadór husi nasaun seluk mai servisu iha Timor Leste” dehan Nivio hafoin sai oradór, iha salaun CNE, (30/06).
Nia dehan, wainhira akontese nune’e Timor Leste tenke iha rekursu umanu ne’ebé kualidade atu bele kompete iha merkadu traballu nian, tan ne’e presiz haree fila fali ba iha prokura no oferta husi merkadu traballu no mós instituisaun sira ne’ebé liga ba merkadu traballu nian, nune’e responsabilidade atu reduz dezempregu ne’e la’ós estadu nian mesak maibé husi parte seitor privadu no mai husi ita nia an rasik ne’ebé bele kria kampu traballu ba ita nia an rasik nomós ba ema seluk.
“Traballadór sira ne’ebé ba railiur sira servisu hetan esperénsia foun osan ne’ebé sira hetan haruka mai hodi ajuda mós ekonomia família nian, tanba ne’e di’ak osan ne’ebé tama mós ajuda tebes nomós sira iha esperénsia” dehan Nivio.
Nia salienta tan katak, estadu mós presiza hanoin katak bainhira sira fila mai tenke iha nia kontinuidade katak estadu mós presiza kria kondisaun hodi sira bele kria nia negosiu rasik loke kampu traballu rasik hodi kontribui ba ekonomia rai-laran, tanba ne’e labele hanoin karuka de’it sira ba maibé hanoin mós oinsá nia kontinuidade karik laiha kondisaun maka sira fila mai bele sai hotu dezempregu hodi kontribui ba taxa dezempregu ida sai dezafiu ba nasaun, labele garante de’it haruka traballadór ba nasaun seluk maibé hanoin oinsá atu loke industria nomós diversifika ekonomia iha seitor turizmu, agrikultura, peska no seluk tan.
