Reportajen Joanina Casamiro
Asosiasaun Defisiensia Timor-Leste (ADTL), Selebrasaun Loron Nasional Ba Ema ho Defisiensia ba dauluk iha Timor-Leste ho Tema “Ita Mak Protetor No Promotor Ba Komunidade Defisiensia Iha Sosiedade Timor-Leste” tanba atu atinji meta la husik ema ida hela iha kotuk maka tenke asegura partisipasaun ema ho defisiensia iha planeamentu ba desenvolvementu nasional.
Portavos Asosiasaun Defisiensia Timor-Leste (ADTL), Jacinta Ana Paula da Costa Freitas, Hateten, Iha dia 4 Jullu loron ida importantasia tebes ba komunidade defisiensia iha Timor-Leste, tanba liuhuusi dekreitu lei nu.10/2023 Iha loron 5 April 2023, governu aprova ona loron ne’e hanesan loron nasional ba ema ho defisénsia iha Timor-Leste. tanba ne’e husu ba entidade hotu atu valoriza loron importante ne’ebé aprova ona husi Governu hanesan loron nasional ba ema ho defisénsia ne’e.
“Ema ho defisénsia barak mak sei moris iha vulneravel nia laran, tanba ne’e, ami husu ema hotu atu sai Proteje no promove ema ho defisénsia iha ita nia sasiedade. Ema ho defisénsia nesesita oportunidade atu hola parte no participa iha area oioin ba dezenvolvimentu la’os nesesita deit karidade,” dehan Portavos ADTL, Jacinta Ana Paula, liuhusi Konferensia Imprensa iha edifisiu ADTL Mascarinhas, Tersa 4/07.
Nune’e mós husu ba Governu da-9 liliu Ministeriu Solidaridade Sosial no Inkluzaun, atu konsidera loron ne’e no aloka rekursu atu fo atensaun ba asuntu defisensia iha Timor-Leste nomós ba Ministeriu hotu ne’ebé hola parte iha PAN Defisiensia hanesan Ministeriu Saude, Ministeriu Edukasaun, Ministeriu Joventude Desportu, Arte no Kultura, Ministeriu Ensinu Superior, Ministeriu Justica, Ministeriu Transporte no telekomunikasaun, Ministeriu Obras Publiku, SEFOPE, SEII no SEKOMS atu aloka nia rekursu implementa planu asaun nasional defisiensia tinan 2021-2030. no tau Ministeriu Obras Publika atu garante kontruksaun foun hotu, tenke asegura asesibilidade fisiku nune’e ema ho defisiensia bele asesu ho diak iha edifisiu, estrada no fatin publiku sira hotu.
Alende ne’e mós, nia apela ba Parlamentu Nasional atu kontinua monitoriza no Fiskaliza atividade Governu nian ne’ebé iha relasaun ho asuntu defisiensia liliu implementasaun PAN defisénsia no konselhu ONU ba direitu ema ho defisiensia. Husu Parlamentu Nasional atu diak liu konsellu Nasional ba direitu ema ho defisénsia responsabiliza direita ba Parlamentu Nasional nune’e husu Komisaun APN atu hamutuk ho organiasaun hirak ne’ebé serbisu no tau matan ba ema ho defisénsia prepra dekreitu parlamentar no estatutu konsellu nian no sira mós kontinua alerta ba Governu atu aloka rekursu estadu nian ba asuntu defisénsia iha Timor-Leste.
