Reportajen Joselina dos Santos
Komandu Polísia Nasional Timor-Leste (PNTL) Munisípiu Díli, husu ba lider organizasaun Arte Marsiais Persaudaraan Setia Hati Terate (PSHT) Timor-Leste, tenke koopera ho komandu munisipiu antes atu halao atividade pre-test, nune’e bele jere jestaun atividade ne’e la’o di’ak, no labele fó impaktu ba públiku hodi halo komunidade sira ta’uk no trauma.
“Koñesimentu kona-ba atividade pretes ba iha organizasaun PSHT ita iha orden, husi operasaun nasional to’o ona iha komandu. Komandu munisípiu halo ona planu espesífiku komandu nian, atu asegura ba iha atividade PSHT nian”, dehan Komandu PNTL Munisipiu Díli Superientendente Xefe Polisia, Orlando Gomes, liu hosi Konferénsia Imprensa iha Kaikoli, 27/07.
Komandu PNTL Munisipiu Díli Superientendente, Xefe Polisia Orlando Gome hatete, tenke iha koordensaun no komunikasaun di’ak atu atividade sira ne’e la’o tuir orden, tanba atividade ne’e sei la la’o tuir sira nia hakarak, entaun sira tenke rona orden husi komandu munisípiu, atu bele la’o di’ak, labele hetan konfrontus durante atividade.
“Lider sira tenke kumpri regras tantu regras husi KRAM no mos orientasaun husi komandu munisípiu, buat hotu organiza tuir orden, laiha ida mak tuir nia hakarak, karik ikus mai mosu problema lider mak ami sei foti. Nune’e ami hein sira nia oráriu ba fatin ne’ebe sira halo pre-test, depois mak ita junta operasaun atu bele halo monitorizasaun ka apoiu seguransa ba atividade ne’ebe sira halo.”
