Reportajen Agustinha Amaral
Trabalhador Cassino João de Piedade, kontenti tebes bele hetan oportunidade ba servisu iha Korea. Nia hatete, hanesan joven labele lakon oportunidade tuir formasaun hodi ba servisu iha ema nia rai, tanba liu husi oportunidade ida ne’e bele hasa’e koñesimentu hodi dezenvolve abilidade no dezenvolve aan.
“Tanba hetan oportunidade ida ne’e la’os ema barak mak hetan, maibé henesan sorti ida, tanba ne’e mai ha’u normalmente kontenti tebes no pesoal agredese ba Governu no SEFOPE, tanba liu husi meius ida ne halo joven barak la mete ona ba problema no muda hahalok kriminozu sira hodi hanoin ba moris ba aban bairua nian no hakarak dezenvolve nasaun no familia nia moris,” nia hatete.
Iha parte ida mos nia sente tristi tanba husik hela familia. Nune’e mos nia husu ba joven sira atu aproveita formasaun sira hodi bele hetan oportunidade servisu, atu labele tane liman bebeik.
“Ha’u nia mensajen liu-liu ba kolega joven sira simples de’it, sai nu’udar joven ne’e ema fo sala liu mak joven, atu di’ak ka aat ne’e iha joven ka nasaun nia liman? Liu husi edukasaun, formsaun naun-formal bele iha edukasaun forma ita aprende iha área saída de’it hanesan mos agora da-dauk ita kursu lian Korea lori ba buka servisu iha rai li’ur atu nune’e ita mos kolabora ho nasaun RDTL la’os ita tane liman hela de’it ba RDTL, maibe husu rasik ba ita nia aan ita halo saida ba nasaun RDTL.”
Iha parte sroin, Diretor Direisaun Nasional Empregu Exterior (DNEE), Filomino Soares informa, ohin sira halo konkordansia ida entre familia trabalhador ho SEFOPE atu prontu husik traballador na’in 29 ba servisu iha Korea Sul, nune’e bele antisipa karik problema ruma parte rua iha responsabilidade hanesan.
“Tanba ita akonpaña akontese barak iha media, durante programa ita haruka traballador ba serbisu iha rai li’ur sempre mosu problema barak, balun lakon vida iha serbisu fatin, balun bulak, balun moras mak mate, kuandu akontese problema sira hanesan ne’e, akontese traballador sira iha Korea, familia no governo lalika dun ba malu,” informa direitor DNEE ba jornalista iha salaun Timor Lodge, Kinta, 17/08.
