Reportajen David da Costa
Assosiasaun Dalan ba Naroman (ADBN), ohin distribui ekipamentu pinheira rai-henek nomós material salva aan nian ba komunidade pinheirus hamutuk 15 iha área suku Bebonuk postu administrativu Dom Aleixo Munisípiu Díli.
Benefisiáriu ne’ebé ohin simu ekipamentu sira ne’e mai hosi área Comoro, Madohi no Bebonuk nia ne’ebé lor-loron halo serbisu pinhera rai-henek iha mota laran.
“Benefisiáriu sira ne’ebé ohin ita konsege distribui ekipamentu ba sira ne’e maioria hosi área Bebonuk nia hamutuk 10, Madohi na’in 4 no 1 hosi Comoro, entaun total benefisiáriu ne’ebé ohin simu ekipamentu ne’e hamutuk 15,” dehan Vice Diretór ADBN, Jerónimo Fernandes ba Neon Metin liuhusi WhatsApp, Tersa 5/12.
Iha âmbitu distribuisaun ekipamentu ne’e ekipa ADBN apela ba komunidade pinheirus sira atu labele pinhiera rai-henek besik área protezidu sira.
“Ohin ita boot sira simu ona ekipamentu sira ne’e ami husu atu utiliza ho di’ak no ami nia lia menon ba imi mak ne’e, labele pinhiera rai-henek besik bronzon no ponte sira hodi estraga fali fasilidade públiku, ne’e área protezidu ne’ebé Governu bandu atu labele pinhiera iha área sira ne’e,” Jerónimo apela ba komunidade pinheirus sira.
Nune’e mós ADBN enkoraja ba komunidade pinheirus sira atu kontinua hamutuk ho ekipa ADBN hodi halo limpeza regular iha mota laran sira, atu nune’e ambiente sira iha sidade Dili ne’e bele moos.
“Inan-aman, tiu-tia sira, agora ne’e tempu udan, nune’e lixu iha mota laran sei aumenta makaas, tanba ne’e husu ita hotu nia kolaborasaun di’ak atu ba oin halo netik limpeza hamutuk, pelumenus fulan ida dala ida nune’e ita bele asegura ita nian ambiente moos. Selae lixu sira iha mota laran ne’e husik de’it nune’e nia ba hotu iha tasi laran ne’eba entaun bele estraga hotu ita nia biodiversidade tasi nian,” nia husu ba komunidade pinheirus sira.
Benefisiáriu Mateus Coelho, sente kontente ba ekipamentu ne’ebé Governu ho ADBN fó ajuda ba komunidade pinheirus sira maibé nia mós sujere atu Governu kontinua fó apoiu ba sira iha futuru oin mai.
“Ha’u sente kontente, tamba ohin bele hetan apoio ekipamentu ida ne’e, tanba ne’e ha’u agradese tebes ba Governu. Maibé ha’u mós sujere ba Governu atu kontinua fó ajuda ami, tanba ami nia maluk sira ne’ebé ami pinhera hamutuk ne’e barak mak seidauk simu,” nia hateten.
Enkuantu Tipu ekipamentu sira ne’ebé ohin ADBN distribui ba komunidade pinheirus sira mak hanesan karosa, rede númeru 1 ho 2, aisuak besi, kanuru pinheira rai-henek kiik-boot, kapasete salva ulun, botas, rompi no maskra.
No hosi tinan 2022 mai to’o 2023 agora ADBN konsege distribui ona ekipamentu pinheira rai-henek no material salva aan nian ba komunidade pinheirus sira hamutuk 144.
Orsamentu ne’ebé aloka ba sosa ekipamentu no material salva aan nia ne’e hetan apoiu hosi Serviços de Apóio á Sociedade Civil e Auditoria Social (SASCAS-VPM) liuhusi subensaun públika hamutuk $10.000,00.
