Reportajen David da Costa
Zevonia Vieira Re-eleitu nu’udar Prezidente Asosiasaun Jornalista Timor Lorosa’e (AJTL) ba Periodu 2024-2028 ho votus 109. No nia sei kontinua luta ba liberdade imprensa no expresaun atu ema hotu iha direitu ba asesu informasau, nomos servisu hamutuk ho governu liuhosi Secretario Estado Comunicacão Social (SECOMS) inklui mos parseiru sira seluk hodi implementa programa ne’ebé liga ba direitu digital no literacy digital iha fulan setembru 2024.
Prezidente AJTL, Zevonia Vieira hateten, durante ne’e AJTL kontinua luta ba liberdade imprensa no promove liberdade expresaun iha Timor-Leste, tanba sai hanesan baze fundamental AJTL nian ne’ebé sei la husik hodi dezenvolve media sira nomos halo advokasia ho parseira nasionál no internasionál sira hodi fó treinamentu ba jornalista sira no kria media tour diak liu tan iha futuru.
“Ita hatene regional no global hanesan prinsipiu ida ne’ebé AJTL lakoi hakotu, tanba atu haforsa regional no global signifika ita nia luta ba liberdade imprensa no expresaun ne’e sei forte liu tan. Nune’e tema ba tinan ida ne’e katak “Respeita Sala Redasaun Respeita Públiku nia Direitu ba Informasaun” ida ne’e metin nafatin iha AJTL nia espiritu, bainhira jornalista sira hetan amiasa iha sala redasaun ka intervensaun politika entaun AJTL kontinua firme no alerta ba ema hotu atu respeita papel jornalista sira nian”, dehan Prezidente AJTL Zevonia Vieira, iha salaun CNE Colmera, Domingo 25/08.
AJTL kumpri nafatin misaun AJTL nian ne’ebé fundadór sira rai hela hodi promove direitus umanus diversidade inkluzivu no sai hanesan moto AJTL nian. Ne’e duni presiza hamutuk hodi dezenvolve media tanba ne’e husu ba jornalista sira labele monu ba propaganda interese grupu nian maibe tau interese públiku nia hodi koalia lialoos kontra informasaun falsu sira ne’ebé sempre espalla iha plataforma digital atu bele ajuda públiku la sai vulneravel ba informasaun falsu sira.
Iha fatin hanesan, Secretario Estado Comunicacão Social (SEKoms), Expedito Dias Ximenes hatutan, AJTL hanesan organizaun ne’ebé moris nanis ho pilar importante hodi servisu hamutuk ho estadu hodi halao prosesu dezenvolvimentu nasional.
Tanba ne’e, governu liuhosi SEKoms sei kontinua apoiu AJTL hodi fasilita formasaun no kapasitasaun ba jornalista sira oinsa atu forsa hodi hato’o komunidade nia lian nomos oinsá atu kombate notìsia hoax.
Enkuantu Estrutura Assosiasaun Jornalista Timor Lorosa’e (AJTL) ba Periodu 2024-2028 maka hanesan tuir mai ne’e, Prezidente AJTL Zevonia Vieira, Vise Prezidente Manuel Sarmento Gusmão, Sekretáriu Jerál Joaquino da F. Castelo, Vise Sekretariu Jeral I Sancho Alves Nahac, Vise Sekretariu Jeral II Teodosia Dos Reis, Xefi Departamentu Advokasia no Kapasitasaun Constancio dos Santos Vieira no Xefi Departamentu Balibó V Acacio Pinto.
