Reportajen Silvino Freitas
Kandidatu kadetes foun polisia nasional timor leste (PNTL) husu atu halo desizaun ida hodi anula total rekrutamentu ba kadete foun tinan 2025 neebe dadaun nee iha ona faze teste mediku, labele halo deit suspensaun ba prosesu rekrutamentu, nunee halo fali rekrutamentu foun neebe involve PDHJ, Igreja, Sosiedade Sivil no Akademista iha prosesu rekrutamentu hodi selesiona tuir meritu no igualidade ba ema hotu.
Portavoz kandidatu kadetes foun PNTL Cassandra da Silva dehan, desizaun husi konsellu ministru nian neebe suspende rekrutamentu kadetes foun sira sente dezanimado tanba la responde sira nia ezijensia tanba desizaun refere la fo prioridade ba klarifikasaun ba faktus konkretu ho rigor sei la halakon ignoransia husi ekipa komisaun rekrutamentu, liuliu oknum ofisial sira neebe fasilita nia oan passa iha selesaun dokumentu hodi admite ba teste mediku neebe la tuir kriteria rekrutamentu nian, nunee iha sira nia vijilansia nee husu atu iha loron 20 nian laran kria komisaun ida neebe inklui mos PDHJ atu halo investigasaun iha loron 20 nia laran.
“se ba oin mak iha tan konkursu publiku tenke reprezenta meritu igualidade laos previlejiu, favoritizmu, familiarizmu no tratementu espesial hanesan dadaun nee publiku kestiona nunee ami husu atu forma komisaun neebe inklui PDHJ, Igreja, sosiedade sivil, akademista sira neebe mais kulifikadu” dehan Portavoz kandidatu kadetes foun PNTL Cassandra da Silva liuhusi komunikadu imprensa iha HAK Faról, (12/02).
Nia dehan tan, husi razaun sira nee mak sira husu atu anula rekrutamentu ba kadetes foun PNTL nian laos halo deit suspensaun temporaria, nunee bele fo hikas oportunidade ba kandidatu sira neebe la parovadu atu bele aplika hikas hodi tuir teste, tanba tuir sira nia haree katak husi rekrutamentu nee iha indisius forte ba nepotizmu, nunee sira kestiona profesionalizmu insituisaun PNTL nian neebe bele halakon konfiansa publiku nian ba instituisaun refere.
