Reportajen Joselina dos Santos
Komisaun Organizadora ba komemorasaun loron Masakre Santa Kruz no Loron Nasional Juventude 12 novembru 1991, husu deskulpa ba parte relevante partisipante no publiku relasiona ho fallansu Master of Ceremony ne’ebé la konvida Prezidente Republika, Vise-Primeiru Ministro Reprezentante Tribunal Rekursu MJDAC Lere Anan Timor, Lu-Ólo no Mari Alkatiri hodi ba tau aifunan ba iha Saudozu Max Sthal nia rate. No mós agradese ba media Timor Post ne’ebé fó sai ona komisaun organizadora nia eru espera katak sei hadia liu tan iha tempu tuir mai.
“Ami organiza selebrasaun ida ne’e, hetan fiar husi Ministerio Juventude, Desporto, Arte e Cultura (MJDAC), ami nia preparasaun ne’e hahú iha fulan rua liu ba hodi toma konta ba komemorasaun masakre santa kruz ba dala 33 nomós ba selebrasaun loron nasional juventude ba dala 19. Tanba hetan apoiu finanseiru husi MJDAC total orsamentu hamutuk vinte e dois mil centos ba iha komemorasaun masakre santa kruz no trinta mill ba selerbasaun loron nasional juventude nian”, dehan, prezidente komisaun organizadora jerasaun 12 novembru 1991, Denilson J. Guterres iha salaun CAMSTL, 14/11.
Denilson J. Guterres lori komisaun organizadora jerasaun 12 novembru 1991 nia naran, hato’o ba publiku katak iha selebrasaun ne’e pontus tolu mak sira lori primeiru selebrasaun misa loron masakre santa kruz lao ho diak tanba preside husi Dom Vírgilio Cardeal do Carmo da Silva SDB. Segundu depoizde marsa husi misa motael to’o iha Semitério Santa Kruz lao ho susesu, só iha fallansu mak husi parte MC ne’e komisaun organizadora rekoñese tanba MC la dumina.
“Iha parte seluk informasaun ne’ebé media balun fó sai katak parte komisaun organizadora la fó espasu ba media hodi halo kobertura ne’e laloos, tanba iha ne’eba ha’u rasik mak dehan katak media tenke muda atu ema marsa mai laos la fó fatin. Kada tinan ami sempre fó fatin ba media hodi foti filmajen no halo video tanba ne’e husu media tenke fó sai informasaun ho faktu ne’ebé iha”, nia informa.
Agradese ba parte hotu-hotu komisaun organizadora sei prepara relatoriu finaseiru nian katak hodi fó sai ba publiku nomós MJDAC sira lamai ho intensaun seluk. Nu’udar foinsa’e iha ne’e mesak voluntariu hodi organiza atividade ne’e.
Reprezentante Komisaun Organizadora ba komemorasaun loron nasional juventuve ba dala 19, David da Costa Freitas haktuir, komisaun organizadora rekoñese duni katak iha selebrasaun ne’e fallansu mak MC maibe iha atividade ne’e programa barak mak susesu nune’e fiar katak ba oin sei kolabora diak liu tan husi parte hotu tanba ne’e komemora loron nasional juventude no loron masakre santa kruz nian.
“Apresia ba media ne’ebé fó sai ona ami nia eru tanba fó hanoin ona ami atu bele hadia diak liu tan iha futuru husi sala mak ba loos. Agradese mos ba parte MJDAC ne’ebé fó fiar ba grupu juventude sira hodi organiza atividade refere”, nia dehan.
