Reportajen Silvino Freitas
Relasiona ho konstrusaun estrada rurál husi postu entrada Kelikai-Villa ba suku Lacolio no husi Lacoliu ba suku Letemumo area Ossolia nian ne’ebé nia konstrusaun la’o kuaze tinan 4 ona maibé seida’uk finaliza, nune’e autoridade postu ho munisipiu hala’o ona enkontru ho obras-publika atu konstrusaun ne’e tenke remata iha fulan setembro no outubro entrega ona ba autoridade postu, maski konstrusaun obra ne’e durasaun implementasaun ne’e ba tinan 1 hahú iha 2022 to’o 2023 maibé besik ona tinan 4 seida’uk remata obra no obra refere implementa husi kompaña Meksa no Jatono no kada kompaña responsavel ba distansia kilometru 1.
Administrador Postu Administrativu Quelicai Paul Jacinto Moreira dehan, estrada neebe hahu postu entrada Kelikai vila ba suku Laculiu Letemumo no Abo nian neebe ba too suku Abo nian implementa husi Kompana Simples neebe remata tiha ona, no iha kompana 2 Meksa implementa hahu postu entrada ba too Lacoliu neebe atinji ona 86% no Jatono maka implementa tutan husi suku Lacoliu ba too iha Ossolia Letemumo neebe atinji foin too 36%.
“foin lalais hau aprezenta liuhusi RTTL fo hanoin ba kompana 2 atu aselera lalais ninia obra nee, iha fulan agostu setembru tenke remata karik la remata ami enkamina ba prezidente autoridade atu foti nia solusaun” dehan APA Quelicai ba jornalista sira iha Hotel-Timor, (22/07).
Nia dehan tan, obra refere ninia implementasaun hahu husi tinan 2022 too 2025 kompana Simples remata ona iha 2024 nunee husi kompana 2 nee seidauk retama tanba iha aspeitu lubuk ida nunee nia espera enkontru neebe halo ona ho obras-publika bele aselera lalais atu iha fulan setembru tenke remata.
“obra nee laos husi munisipiu maibe husi nasional direitamente husi obras publika ami simu no ami akompana deit maske pedidu no proposta nee husi suku no postu maibe obra no kontratu nee direitamente husi nasional” dehan APA Paul.
Nia konklui, entre kompaña 3 neebe implementa projeitu refere kada kompaña responsavel ba kada kilometru 1 husi postu entrada too Lacoliu implementa husi kompana Meksa no Lacoliu ba Letemumo kompana Jatono no Letemumo ba Abo husi kompana Simples, ninia durasaun nee too tinan 1 maibe liu fali entaun husi parte autoridade postu halo ona relatoriu ba autoridade municipal, nunee enkontru neebe halo ona husi autoridade postu ho PDI munisipál no obras publika deside ona tenke remata iha setembru no outubru tenke entrega ona.
Nune’e, jornalista neonmetin.info tenta kofirma ho Diretora Kompaña Jatono maibé rejeita fo informasaun kona-ba progressu estrada rural ne’ebe ninia kompaña hala’o hela konstrusaun no hateten deit ninia traballadór dadaun ne’e iha hela terenu hala’o hela servisu no husu jornalista ka media atu buka informasaun seluk, exeptu ninia progresu konstrusaun estrada rural.
