Reportajen Umbelina dos Reis
Prezidente Autoridade Munisípiu (PAM) Dili, Gregorio Saldanha ‘Mouris’ iha loron 28 Janeiru 2025 rezigna an, hosi kargu PAM tanba durante ninia mandatu infreta dezafiu sira hanesan akontese irregularities administrativu no finanseira, falta autonomia administrativu, obstákulu ba realizasaun auditoria, desizaun unilateral no falta koordenasaun, konflitu kompeténsia, preokupasaun etika no sosial.
Situasaun ne’e motiva Gregoriu rezigna-an husi nia kargu nu’udar PAM ne’ebe halao ona durante tinan ida resin.
“Durante ha’u nia mandatu hasoru irregularidade grave sira iha prosesu administrativu, inklui falsifikasaun dokumentu no prosesu sira ne’ebé duviduzu. Preokupante liu mak situasaun iha servisu rekolla lixu manual, ne’ebé identifika tinan ida halakon osan estadu mais ou menus dólar millaun ida, dadus sira-ne’e, fasilita hosi relatóriu sira ne’ebé rejistu hosi sistema automátiku Tibar nian, no evidénsia fotográfiku no videográfiku hosi fulan Agustu 2023 to’o Agostu 2024 nian, foin loron hirak liu ba sua exelénsia SEATOU konfirma rasik bainhira halo verifikasaun surpreza ba kamioneta tula lixu nian.” Dehan Gregorio liuhosi konferensia imprensa ba Jornalista sira iha edifísiu PAM, Tersa-feira, 28/01.
Nia informa katak, falta autonomia administrativu dependénsia demais AMD ba Ministériu Administrasaun Estatal (MAE) estraga kapasidade atu prepara didi’ak desentralizasaun poder lokál, tuir polítika IX governu nian, nune’e obstákulu ba realizasaun auditoria, Iha fulan setembru 2024, husu ba Ministru Administrasaun Estatal (MAE), hodi halo auditoria ba servisu AMD nian maibé auditoria ne’e foin hahú iha fulan Dezembru to’o agora, nia seidauk simu informasaun ruma kona-ba ninia rezultadu.
“Konflitu kompeténsia diresaun jestaun merkadu no turizmu (GMT) ne’ebé hala’o serbisu munisipál nian, tuir lolós submete ba autoridade munisípiu Díli, maibé infelizmente SEATOU maka kontrola lor-loron hodi atua ho violensia hasoru vendedores ambulantes ka komunidade kiak sira ne’ebé hela iha espasu públiku ho sira nia sasan, nune’e konsekuénsia AMD maka hetan fali krítiku no akuzasaun hosi públiku hanesan autór no responsavel.” Nia informa.
Prezidente Komité 12 Novemberu ne’e mos hateten la bele simu pratika violentu sira ne’ebé haterus tan sidadaun povu iha Dili sem kria uluk kondisaun mínima alternativa, ami rejista katak, situasaun ida ne’e atu repete fali prátika desumanu sira ne’ebé uluk ema rai seluk sira halo hasoru ita nia povu hahalok iresponsável ne’ebé ita nunka konkorda to’o ita manán Independénsia.” Nia konklui.
