Reportajen David da Costa
Sekretária Estadu Igualdade (SEI) mós fó apoiu ba Assosiasuan Feto no Grupu Feto sira liuhosi Fundu Transférensia Públika (TP) atu feto sira hala’o atividade ekonomia hodi aumenta sira nia rendimentu no jere osan rasik.
Sekretária Estadu, Albina Marsal Carvalho hateten, Kongresu Feto iha munisipiu sira hotu. Kongresu Feto nia objetivu mak atu lori hamutuk feto sira ho abilidade no background oin-oin hodi indentifika sira nia nesisidades hodi dezenvolve sira nia planu hodi apoiu no hakbiit feto sira iha munisípiu hotu-hotu no RAEOA atu hala’o atividade sira relasiona ho sosiu-kultural, ekonomia no partisipasaun polítiku.
“Programa “Hau Prontu 100%” ba feto sira iha potensialidade ba lideransa mós kontribui ba hasa’e partisipasaun feto iha governasaun lokál no pozisaun foti desizaun,” Dehan Albina Marsal Carvalho, Bainhira Partisipa workshop kona-ba Desentralizasaun iha Timor-Leste ‘Lori Servisu Munisipal Besik liutan ba Sidadaun’ Iha Hotel Timor, Tersa 25/02.
Tanbe ne’e, SEII mós fó apoiu ba Assosiasuan Feto no Grupu Feto sira liuhosi Fundu Transférensia Públika atu feto sira hala’ o atividade ekonomia hodi aumenta sira nia rendimentu no jere osan rasik nomós envolve iha atividade sira seluk hodi eleva sira nia kapasidade lideransa no prevene violensia.
Nune’e mós SEI sei kolabora organizasaun sira hanesan UN WOMEN, PATRIA, CAUCUS, REDE FETO no MOFFE hodi hala’o workshop no formasaun ba feto sira ne’ebé kandidata an ba xefe suku no lideransa Munisipal nian.
“SEI mós sei halo esforsu liu tan atu fo formasaun no konxiensializasaun ba votante sira atu bele vota ba kandidatu feto,” Nia explika.
Nia explika liu tan, iha tinan 2023-2024, SEII ho UN WOMEN halo ona formasaun ba partisipante sira hamutuk 113 (Feto 71 no mane 42) atu explora sira potensialidade ba lideransa no dezafia norma sira ne’ebé mak blokea feto sira atu asumi knaar iha lideransa komunitaria no Munisipal sira.
Tanba ne’e, SEI sei kontinua servisu ho parseiru sira atu asegura implementaun monitorizasaun ba enkuadramentu sira.
