Reportajen David Costa
Embaixadora Estadus Unidus Amérika (EUA), Donna Ann Welton hala’o enkontru despedida ho Prezidente Repúblika (PR) José Ramos-Horta, hato’o mós profunda apresiasaun no agradesimentu bá kooperasaun ne’ebé nasaun rua estabelese to’o ohin loron.
Embaixadora Estadu Unidos Amerika (EUA) Donna Ann Welton, hateten, Ohin mai hasoru malu ho Prezidente Repúblika, tanba iha tempu badak mandatu sei remata, ho ida ne’e mai hato’o agradesimentu ba Prezidente Repúblika ho amizade no koopersaun ne’ebe maka Timor-Leste ho Estadu Unidos Amerika iha no espera katak ba oin EUA ho Timor-Leste nian amizade ho kooperasaun ne’e bele kontinua nafatin ba oin.
“Ha’u atu reforma ona, iha tempu badak ha’u sei fila fali ba ha’u nian nasaun, ho ida ne’e ohin hau mai enkontru ho Prezidente Repúblika hodi hato’o ha’u nian agradesimentu ba ita nia amizade ho kooperasaun. Ha’u espera katak ba oin ita nian amizade ho kooperasaun ne’e bele metin nafatin no kontinua nafatin,” Dehan Embaixadora EUA, Donna Ann Welton ba jornalista sira bainhira remata despedida ho Prezidente Repúblika José Ramos-Horta iha Palásiu Prezidensiál Bairu-Pite, Tersa 18/02.
Nia haktuir, EUA ho Timor-Leste iha kooperasaun nível hotu-hotu, iha nível global iha Nasoins Unidas, no iha mós kooperasaun iha asuntu Defesa nia, setor ekonómiku no sosial. Entaun ohin ko’alia ho Prezidente Repúblika kona-ba asuntu kooperasaun hotu-hotu. Espera katak bele fila fali mai iha Timor-Leste, atu bele hasoru-malu fila-fali ho kolega no belum sira ne’ebe iha Timor-Leste.
“Ha’u hili atu reforma, tanba agora ha’u nia tinan to’o duni ona atu reforma no hau nia idade reforma ne’e hau nia governu mos haree katak tempu apropriadu ona atu ha’u reforma,” Nia dehan.
Politika Prezidente Estadu Unidos Amerika Donald Trump nian ne’ebé maka taka apoiu fundus ba USAID sira iha mundu ne’e afeita kalae? ida ne’e seidauk hatene, maibé agora sira halo hela revisaun ba ajuda externa sira oferese ba nasaun sira iha mundu.
“Ha’u apresia ba ita boot sira nia preokupasaun ne’e, agora dadaun ne’e Prezidente foun Trump ho ninia governu halo hela revisaun ba ajuda externa sira oferese ba nasaun sira iha mundu. ita seidauk hatene kona-ba dezisaun serta kona-ba ida ne’e, tanba buat hotu iha hela diskusaun nia laran, agora ita seidauk hatene karik afeita ka lae? buat sira ne’e hotu iha hela diskusaun nia laran,” Nia esplika.
Nia explika tan, USAID iha Timor-Leste seidauk taka, no programa hotu-hotu ne’ebe maka USAID hala’o iha Timor-Leste ne’e, agora iha hela revisaun nia laran no funsionáriu sira servisu iha USAID ne’e servisu nafatin hanesan bain-bain.
Antes ne’e mós Embaixadora Estadus Unidus Amérika (EUA), Donna A. Welton hala’o enkontru despedida ho Primeiru-Ministru (PM), Kay Rala Xanana Gusmão, aprezenta mós profunda apresiasaun no agradesimentu bá kooperasaun ne’ebé nasaun rua estabelese to’o ohin loron.
Donna A. Welton entrega karta kredensiál hosi Prezidente EUA, Joe Biden bá Prezidente Repúblika Demokrátika Timor-Leste, José Ramos-Horta hodi hala’o knaar hanesan diplomata iha TL iha loron 16 Jullu 2024.
