Home Justisa Carlos ho Família Hakfodak Simu Karta Notifikasaun Hosi TR Hamamuk Sira nia...

Carlos ho Família Hakfodak Simu Karta Notifikasaun Hosi TR Hamamuk Sira nia Hela Fatin

2407
0
Carlos ho nia familia hatama keixa iha Rede ba Rai. [Foto: Santy | 09.02.2022]

Reportajen David da Costa Gusmao

Iha loron 11 Outubru 2021 Carlos ho nia família hakfodak hetan karta notifikasaun husi Tribunal Rekursu (TR), ne’ebé mak keixa husi Alzira Ximenes ,katak família Carlos nian tenke hamamuk  fatin iha Bairo Aimeti-Laran, Suku Comoro, Aldeia terus-nanis, postu Dom Aleixo Munisipiu Dili.

“Iha loron 11 Outubru 2021 Tribunal Rekursu (TR) sira lori karta notifikasaun ba to’o iha uma, hau ho família sira hakfodak bainhira hetan karta notifikasaun husi TR atu hamamuk rai ida ami hela ba ne’e. iha momentu ne’e Alzira Ximenes haruka ami sai,  maibe tanba iha situasaun Covid-19 hela, entaun sira para tiha no iha loron 2 Fevereiru tinan ne’e, sira atu ba hasai ami mos la jadi, no ami rona fali katak aban PNTL ho F-FDTL atu mai hasai ami husi ami nia hela fatin,” dehan rai-na’in Carlos Soares ba jornalista Neon Metin iha Farol, Kuarta 9/02.

Nia dehan, sira laiha relasaun família ho Alzira Ximenes, no nungka halo problema ho nia, maibe derrepente deit nia dehan rai ne’e ninia, no simu karta notifikasaun husi Tribunal Rekursu Rai ida agora família sira hela ba ne’e rai privadu, no hahú hela iha ne’e husi Portugues nia tempu to’o mai agora.

“Rai ne’e ami nia privadu no iha 17,000 M2 Meterpersegi, no ami surat konaba rai ne’e kompletu. Rai agora hau ho família hamutuk uma kain haat (4), no ema hamutuk 40 resin mak hela ba, hahú iha tempu Portugues nian to’o mai agora, hau nia oan mos na’in sia moris iha ne’e, no be-oan aumetan tan tiha ona, no moris iha rai ida ne’e, maibe  Alzira Ximenes mai dehan nia mak rai na’in,” nia esplika

Nia hatutan Alzira ho nia laen Domingos Ximenes, ema Venilale, serbisu hamutuk ho Militár Indonesia, “atu oho ami hodi okupa ami nia rai, maibe ami halai tiha ba subar no to’o ohin loron mai fali hela iha ami nia fatin maibe Alzira ne’e mai fali dehan rai ne’e ninian”.

Ho ida ne’e hakarak husu ba Tribunal atu haree mós konaba direitu rai-nain nian, tanba depende mós la loos, tanba rai ne’e seidauk koalia iha Tribunal, derrepente deit karta notifikasaun ne’e mai.

“Ho ida ne’e ami husu ba Tribunal Rekursu (TR) atu haree mos direitu ami nian, ami nu’udar rai na’in depende mós lia los, tanba hau ho nia seidasuk koalia iha Tribunal konaba rai ne’ebé ami hela ba ne’e, mas karta notifikasaun husi tribunal mos mai fali. Tanba ne’e ami hakarak husu atu kria justisa ne’ebé justu ba ami,” nia hateten.

Iha fatin hanesan Joana Fatima nu’udar oan husi Carlos Saores dehan, nungka haree Alzira Ximenes hela iha rai ne’e, no uma deit mos laiha, se rai ne’e Alzira Ximense nian tenke mai hatudu nia oin no koalia iha Tribunal.

“Ami la simu ho justisa ne’e mak agora hatudu ba ami ne’e, ami la simu tanba ami nungka koalia Alzira Ximenes, derrepente deit ami hetan karta notifikasaun husi Tribunal katak ami tenke sai husi fatin ne’e”, hateten Joana ba Neon Metin

Nune’e família husi Carlos hatama mos keixa b Rede ba Rai atu bele hare, no halo monitorizasaun ba rai ne’ebe agora dadauk hetan ona notifikasaun husi Tribunal Rekursu.

To’o notísia nee tun, Neon Metin sedauk halo konfirmasaun ho parte Alzira Ximenes, no sei esforsu atu halo konfirmasaun iha tempu badak.

Print Friendly, PDF & Email

LEAVE A REPLY

Please enter your comment!
Please enter your name here