Reportajen Filomena da Conceicao
Presidente Komite Em Ezersisiu 12 de Novembru, Filipe Pereira, apelu ba joven sira atu kontinua aprende tanba joventu ida ne’ebe lakohi estuda, sei lakon nia futuru, Tanba joventude mak sai kontinuador ba existensia nasaun Timor-Leste nian.
“Joven sira ne’ebe hakotu sira nia estudu iha dalan klaran, ikus mai imi sei lakon imi nia futuru. No imi lakon imi nia futuru signifika Timor-Leste ne’e mos sei lakon nia futuru, tanba joven mak kontinuador nasaun nia existensia iha tinan oin mai”, dehan Presidente Komite iha ninia diskursu ba komemorasaun 12 November ba dala 33 iha Santa Cruz, 12/11.
Nia salienta, laiha razaun ba joven no foinsa’e sira atu lakohi estuda, tanba governu loke ona eskola gratuita ba joven sira husi ensino Primariu to’o sekundaiu atu asesu gratuita, ho ne’e joven hotu tenke dedika an hodi kontinua aprende atu bele dezenvolve futuru nasaun nian.
“Hau mos hakarak hateten ba joven sira ne’ebe ohin loron selebra sira nia loron ba Joventude Nasional Timorense ba dala 19, hakarak fo hanoin ba ita boot sira hotu katak joven barak mak uluk mate ba rai ida, ne’e no joven barak nak uluk halo asaun politika aberta husi Timor tama to’o Indonesia barak maka lakon sira nia estudu, maibé sira la lakon independensia Timor nian tanba sira lakon sira nia estudu hodi manan independensia“, dehan Nia
Tanba ne’e joven sira agora ne’e tenke Estuda, agora ensino baziku to’o sekundaiu gratuita, tanba ne’e estuda didiak atu bele hetan valor diak atu bele tama iha Universidade públiku sira ne’ebe selu Kiik, tanba ne’e mak laiha razaun ba foinsa’e sira dehan lakoi estuda tanba faktor seluk.
“Governu sei lori nafatin eskola sira atu hakbesik ba iha komunidade ne’ebe maka governu tenke halo no ita fiar katak joven hotu sei la hakotu sira nia estudu iha dalan Klaran,” Nia dehan.
