Reportajen David da Costa
Prezidente Repúblika (PR), José Ramos-Horta fiar katak Amo Papa foun, sua Santidade Papa Leão XIV, iha esperiénsia ne’ebe hanesan ho Papa Fransisco nian ho kontinua tau matan ba mundu tomak hanesna Papa Fransisco tau matan.
Prezidente Repúblika (PR), José Ramos-Horta hateten, Povu Timor-Leste tomak, nu’udar katoliku, hanoin hotu-hotu akompaña ona, eleisaun Konsellu Kardial sira hili iha Roma Amo papa foun, ne’ebe sidadaun Amerikano husi Sidade Chicago, Illinois iha Amerika ho naran foun Leão XIV mak elitu ba iha Amo Papa foun.
“Ita hotu-hotu espera deit, komfia, Papel ne’ebe Amo Papa Fransisco, Saudozu halo iha mundu, halo ba Timor-Leste, iha Timor-Leste, luta ba kiak sira, kiik sira, luta ba ordem ekonómia Mundiál ne’ebe justu. Ne’ebe nia koalia makaas ba terus iha Gajah, palestina sira nia, nia ko’alia makaas ba situasaun iha Myanmar, nia ko’alia dala barak funu iha mundu ne’e ho forsa moral ne’ebe mai husi Papa Fransisco,” dehan Prezidente Repúblika José Ramos-Horta iha Palásiu Prezidensiál Bairu-Pite sexta 9/05.
Espera Papa Leão XIV sei kontinua misaun ida ne’e ba mundu tomak, maske Amo Papa la’os figura polítika, la’os figura estadu i la halo politika, maibé mensajen kona-ba damen, mensajen kona-ba rekonsiliasaun, mensajen solidariedade ba kiak sira, ba rai sira ne’ebe enfrenta funu, konflitu oi-oin ne’e importante tebe-tebes iha Amo Papa.
“Se maka tur iha saun Pedro nia galeria iha Roma, halo tuir buat ne’ebe ita hatene ona. Tanba uluk Papa João Paulo II, depois tuir mai, ikus liu Papa Francisco. Ne’e maka importante hanesan inspirasaun lideransa moral, etika ne’ebe bele mai husi santa se,” Nia dehan.
“Ha’u fiar Amo Papa Leão XIV, ne’ebe uluk besik Papa Francisco, sira iha esperiénsia hasesan,” Nia deklara.
Nia explika Amo Papa Fransisco ema husi Argentina, tinan lubuk ida iha Argentina, nia hatene tempu ditadura militar iha Argentina. No Amo Papa Leão XIV iha Peru, tinan rua nolu iha ne’ebá, sira koinese saida maka pobreza, saida mak kiak sira nia terus, nia sofrement, ne’e duni iha konfiansa ba Amo Papa Leão XIV.
Nia esplika liu tan, iha mundu aktual situasaun difisil tebe-tebes, konfrontasaun oi-oin, Amo Papa Leão XIV bele fahe nia mensajen ne’ebe mai ho forsa nu’udar Papa ba mundu tomak no sei tau matan mós hanesna Papa Fransisco tau matan, tau matan ba Timor-Leste.
Biografia badak Papa Leo XIV
Papa Leão XIV, moris ho naran Robert Francis Prevost, nia moris iha loron 14 fulan-Setembru tinan 1955, iha Chicago, Illinois, nia nu’udar ulun-boot Igreja Katólika nian no soberanu ba Estadu Sidade Vaticano. Nia eleitu nu’udar Papa ba dala 267 iha loron 8 fulan-Maiu tinan 2025, hodi troka Saudozu Papa Francisco.
Papa Leão XIV moris iha família ida ne’ebé iha hun husi Fransa, Itália, no España. Nia remata nia estudu sekundáriu iha semináriu ki’ik husi Ordem Santo Agostinho nian. Iha tinan 1977, nia hetan grau Lisensiatura iha Siénsia kona-ba Matemátika husi Universidade Villanova.
Ho desizaun atu sai amu-lulik, Papa Leão XIV tama ba Ordem Santo Agostinho nian iha fulan-Setembru tinan 1977, halo nia votu dahuluk iha tinan 1978 no votu perpétuu iha tinan 1981. Nia hetan grau Mestre iha Divinidade husi Catholic Theological Union iha Chicago iha tinan 1982 no ordenadu sai amu-lulik iha loron 19 fulan-Juñu tinan 1982. Tuirmai, nia hetan doutoramentu iha Direitu Kanóniku husi Pontifícia Universidade Santo Tomás de Aquino iha Roma.
Papa Leo XIV ko’alia lian barak, inklui inglés, españól, italianu, francés, no portugés. Nia mós bele lee latín no alemán
