Reportajen David da Costa
Relasiona ho Komunidade ne’ebe maka hela iha Palásiu Prezidensiál nia kotuk ne’ebe Sekretáriu Estadu Asuntu Toponímia no Organizasaun Urbana (SEATOU) hasai ne’e, Primeiru Ministru (PM) Kay Rala Xanana hatete katak Prezidente Repúblika (PR) José Ramos-Horta maka husu ba SEATOU ba hasai, atu nune’e bele hari’i dormitóriu ba estudante feto sira.
Primeiru Ministru (PM) Kay Rala Xanana Gusmão, Hatete, ohin hasoru malu ho Prezidente Repúblika (PR) José Ramos-Horta nia informa katak hasai ona komunidade sira aitarak laran ne’ebe maka hela iha Palásiu Prezidensiál nia sorin no atu halo dormitóriu ba estudante feto sira ne’ebe maka tun husi munisípiu mai ne’e atu hela maibé sira hela ne’e laos gratuita maibé selu.
“Hasoru malu ho Prezidente Repúblika mós informa, imi haree ona komunidade sira iha Aitarak Laran ne’ebé hasai, nia atu halo dormitóriu ida ba estudante feto sira ne’ebé husi Munisípiu mai hela, la’ós gratuita, selu-selu uitoan-uitoan,” Dehan Primeiru Ministru (PM) Kay Rala Xanana Gusmão ba jornalista sira bainhira remata enkontru ho Prezidente Repúblika José Ramos-Horta iha Palásiu Prezidensiál Bairu-Pite, Kinta 24/07.
Dormitóriu ne’e Emirante Árabe Unidus maka atu halo, loloos ne’e dormitóriu ba feto sira husi munisípiu mai hela ne’e atu halo iha Balide, mais fatin iha ne’eba ne’e klo’ot ne’ebé mai halo iha palásiu nia kotuk ne’e.
Xefe Governu ne’e horseik fila husi nia vizitasaun ba Singapura, liuhusi Aitarak laran haree komunidade nia hela fatin ne’ebe maka governu liuhusi Sekretáriu Estadu Asuntu Toponímia no Organizasaun Urbana hasai hotu ona komunidade sira maibé hasai sira ne’e Prezidente Repúblika rasik maka husu ba SEATOU mai hasai.
“Ha’u horsehik to’o, ha’u liu, ha’u haree, ha’u dehan SEATOU mate ona, afinál Prezidente Repúblika mak husu SEATOU mai hamoos tiha lai,” dehan Primeiru Ministru.
Primeiru Ministru hatete, atu fó Indeminizasaun ba komunidade sira ne’e, osan la fó direta ba komunidade sira afetadu maibé osan sira ne’e governu sei halo transperénsia liu husi banku maka komunidade afetadu sira foti.
“Indeminizasaun ne’e la fó osan direita, hatene katak osan haruka ba banku, la’ós ita mak fó osan direta ne’e lá’os indeminizasaun, tenke kontrola buat ne’e hotu,” nia subliña.
Maibé bankada Fretilin lamenta ho serbisu SEATOU nian katak, hasai komunidade la prepara fatin ba komunidade sira, Maibé Xefe Governu dehan nia foti lima no atu liberta povu ne’e hanesan ne’e
“La prepara, ne’e ha’u foti liman ba Fretilin, liberta povu ne’e hanesan ne’e,” dehan Xanana.
Antes ne’e, Prezidente Republika José Ramos-Horta, hatete, nia iha enkontru ida ho liu rai boot Emirante Árabe Unidus (EAU) nian, nia konfirma Kona-ba projetu ida ne’ebé EAU atu apoia ba Timor-Leste, atu halo rezidensia ida ba estudante feto iha Timor-Leste. Projetu konstrusaun ne’ebe EAU sei apoiu rezidensia ba estudante Timoroan ne’ebe eskola universitariu iha Timor, para bele hala’o sira nia estudu, projetu ne’e atu hahú tinan ida ne’e nia laran.
“Dezenu ne’e tekniku husi EAU halo servisu hela, nia haree ona video aprezentasaun ba modelu projetu refere ne’ebe di’ak tebe-tebes, ne’e uluk kedas nia husu ba liu rai boot Emirante Árabe Unidus nian,” dehan Ramos-Horta.
Dormitóriu ne’ebe maka EAU oferese ba Timor, hodi halo edefisiu ida iha Timor sai edefisiu modernu ba Timor tomak ne’e gratuita 100%, para bele simu estudante feto Timoroan sira ne’ebe tun husi munisípiu mai ne’e bele hela para ba eskola.
