Reportajen David da Costa
Negosiasaun formál segunda ronda kona-bá Fronteira Maritima ne’ebé hala’o iha Jogjakarta-Indonézia, durante loron tolu ne’e, lori satisfasaun bá ekipa negosiadór hosi Timor-Leste (TL) ho Repúblika Indonézia (RI) tanba konsege ko’alia bá malu, simu ideia no iha vontade atu kontinua diskute fali iha tinan oin.
Iha komunikadu Imprensa ne’ebe Neon Metin asesu husi media Gabinete Primeiru Ministru katak Primeiru-Ministru (PM), Kay Rala Xanana Gusmão observa katak durante prosesu negosiasaun iha ronda daruak ne’e ekipa hosi parte rua hatudu vontade bo’ot ne’ebé hakarak tebtebes atu rezolve duni fronteira marítima rai rua nian.
“Ha’u labele ko’alia buat barbarak tanba formalmente ita foin hahú agora iha Jogjakarta. Ne’e duni, ha’u espera katak negosiasaun tuir mai iha fulan Abríl, tinan oin sei bele dehan buat ruma. Ha’u labele dehan ha’u kontenti tebes maibé satisfeitu tanba ita haree katak ita bele ko’alia bá malu, bele simu ideias bá malu. Ida ne’e mak prinsípiu di’ak ida iha negosiasaun ne’ebé difísil kona-bá fronteira marítima,” dehan PM Xanana iha komunikadu Imprensa ne’ebe Neon Metin asesu husi Media Gabinete Primeiru Ministru Xanana Gusmão ohin, 11/12.
Negosiasaun formál primeira ronda hala’o iha fulan-Agusto 2025, iha Dili no segunda ronda hala’o iha Jogjakarta. Ekipa konkorda ona atu kontinua negosiasaun formál tuir-mai iha fulan-Abríl 2026.
“Durante loron-rua ho balun ne’e diskusaun la’o di’ak, ho abertura hosi parte Indonézia lidera hosi Embaixadór Amrih. Ita senti katak iha abertura, iha kooperasaun, iha duni vontade hosi Governu Indonézia atu rezolve ita nia fronteira maritima,” Xanana afirma.
Negosiasaun formál segunda ronda kona-bá Fronteira Marítima iha Jogjakarta hala’o durante loron-tolu (08-10 Setembru 2025) taka ho asina akta hosi Xefe delegasaun nasaun rua nian, Timor-Leste asina hosi atuál Diretora Ezekutiva Gabinete Fronteira Terestre no Marítima (FTM), Elizabeth Exposto. Indonézia asina hosi Diretór Jerál Asuntu Jurídiku no Tratadu Internasionál sira, Ministériu Negósiu Estranjeiru, Embaixadór L. Amrih Jinangkung, iha The Phoenix Hotel, Jogjakarta, Indonézia, kuarta (10/12/2025).
Rohan hosi serimónia asinatura akta ne’e ekipa hosi Timor-Leste entrega tais, kafé Timor ho livru bá xefe delegegasaun Indonézia nian no foto hamutuk.
Entertantu iha sabadu 6/12/2025, Primeiru-Ministru (PM), Kay Rala Xanana Gusmão hamutuk ho delegasaun bá Jogjakarta Indonézia hodi hasoru-malu ho ekipa Indonézia nian atu hala’o segunda ronda negosisaun kona-bá assuntu fronteira tasi rai rua nian.
Durante enkontru ho Prezidente Repúblika (PR), José Ramos-Horta iha sesta 5/12/2025, iha Palásiu Prezidensiál Bairru-Pité, Primeiru-Ministru atualiza katak, viajen bá Jogjakarta hodi partisipa iha segunda ronda negosiasaun ho Indonézia tanba antes ne’e ekipa hosi nasaun rua hahú ona negosaisaun primeira ronda iha Dili.
Durante iha negosiasaun ne’e mós Xefe Governu sei introdús bá Governu Indonézia kona-bá inisiativa hodi realiza “nahe biti bo’ot” ko’alia nu’udár maun-alin iha fronteira Naktuka ho Amfoang.
