Udan boot neebe akontese iha Domingo lorokraik, too kalan durante oras 4 resin, akontese inundasasaun iha suku iha kapital Dili, nune’e mos afeta komunidade aldeia rua iha suku Kaikoli tenke evakua ba bombeirus Kaikoli, nunee autoridade komunitaria husu governu hadia barajen bee nian tanba suku Kaikoli sempre afeta ba inundasaun bainhira akontese udan, nunee Autoridade Protesaun Sivil (APC) preokupa ho fatin evakusaun atu evakua vitima sira iha tempu situasaun emerjensia hanesan inundasaun.
Xefe Suku Kaikoli Hipolito Marques dehan, udan neebe akontese durante oras 4 resin rezulta inundasaun iha aldeia 5 maioria maka afeta ba inundasaun iha husi udan boot, tanba kondisaun iha area kaikoli nee risku ba inundasaun tanba udan uituan deit bee sae ona maibe dili laran maka bee sae fatin fatin entaun kaikoli bee sae makaas ona, nunee inundasaun neebe akontese iha suku kaikoli aldeia 3 mak evakua maibe aldeia rua 05 tao-laran no 05 fohorai-boot tenke evakua hotu bai ha bombeirus tanba bee sae makaas.
“sira ba neeba atu prevene labarik ferik katuas sira atu udan para sir abele fila mai uma hamoos sira nia hela fatin atu sira fila, ohin dader sira fila hotu ona bombeirus rasik mak tun mai supa bee sira nee” dehan Xefe Suku Kaikoli Hipolito Marques iha nia knaar fatin sede suku kaikoli, (23/02).
Xefe Suku Hipolito konsidera, bee neebe sae makaas estadu presiza tau matan ba bee dalan tenke hadi’a neebe too dadaun nee seidauk loos tanba bee iha foho leten tun mai husi maskarenas vila verde ninia konsentrasaun nee mai hotu iha kaikoli, tanba estadu mai sobu hotu valeta iha tinan 2024 too tama ona 2026 tinan rua ona maibe seidauk hadia, tanba nee tenke hadia bee dalan sira tanba bee dalan neebe dadaun nee iha obra tempu okupasaun indonesia nian.
“inundasaun nee husi aldeia 1 too 5 aldeia 04 ho 05 mak evakua ba bombeiros maibe aldeia 01 to’o 03 ami seidauk rona evakua ka lae, mais orkalan aldeia 02 toba iha sede suku mak barak konaba dadus ami seidauk iha maibe ami nia sefe aldeia sira hola hela dadus aban ami bele iha dadus ona” dehan Xefe Suku Kaikoli Hipolito Marques.
Entretantu Prezidente APC Jesuino Carvalho dehan, udan boot neebe akontese orseik durante oras tolu nia laran afeta inundasaun ba komunidade kaikoli nian nomos Hera, tanba nee komunidade sira tenke fo informasaun ba APC maski iha pontu vocal iha maibe tanba situsaun emerjensia nee tenke fo lalais informasaun ba parte APC, nunee inundasaun iha kaikoli afeta ba komunidade uma kain 26 ema hamutuk 110 labarik kiik 36 inklui bebe ida foin semana 2, nunee husi komunidade nee sira evakua hotu mai iha edifisiu kaikoli tanba sira nia uma kondisaun bee nakonu.
“sira neebe evakua mai iha nee ami fo netik aihan balun ba sira ami mos fo biti ba sira toba tanba ami rasik tam aba parte kaikoli mos sira kolisaun mos bokon hotu, sira mai iha nee orkalan ami servisu hamutuk ho parte ambulansia doutor sira halo konsulta kikoan sira iha nee ida orkalan isin manas makaas ami lori tiha ba ospital” dehan Prezidente APC Jesuino Carvalho liuhusi konferensia imprensa iha APC kaikoli, (23/02).
Nia dehan tan, sira mos iha difikuldade fatin sentru evakuasaun nunee sira iha ekipa balun neebe sei aproxima ba parte relevante atu bele hetan fatin evakuasaun iha tasi-tolu tanba nee APC mos husu tulun ba parte igreja atu situsaun hanesan nee bele halo evakuasaun ba komunidade sira, dadaun APC nafatin halibur dadus sira tanba iha area kaikoli kuaze bee tama deit maibe iha Hera maka mota tun lori rai tam aba komunidade nia uma maibe sira hadia ona no ekipa APC kontinua akompana atu sira nia aihan ruma hetan estragus bele apoiu hikas.
Nune’e komunidade Fernanda Martins husi suku Villa-verde mos afeta ba inundasaun husi udan boot neebe akontese nunee too dadaun nee bee nakonu iha sira nia uma tanba nee mak nia husu tulun ba bombeirus atu bele hasai bee neebe nakonu iha sira nia uma, sira iha familia maibe tanba ho volume bee neebe boot sira labele halo buat ida.
“sasan hanesan jaleira livru kolisaun sira nee hetan hotu estragus, udan bainbain ami la afeta hanesan nee maibe udan kuandu udan hanesan orseik entaun bee husi Estrada boot nakonu bele tama fali ba uma laran” informa Komunidade Fernanda Martins ba jornalista sira iha APC Kaikoli.
Nia dehan tan, uluk iha bee dalan maibe tanba konstrusaun eskola internasional school entaun sira taka bee dalan nunee kuandu udan bee sirkula deit iha moru laran, tanba nee nia husu ba parte kompetente atu halo drainajen ruma atu bee bele lao tuir nia dalan tanba nee nia la fo sala ba parte ida maibe tenke haree atu hadia barajen bee nian atu bele lao tuir nia dalan.
