Reportajen Santina Lucia da Costa
Prezidente Asosiasaun Arte Moris, Iliwatu Danabere, hateten iha sira nia kakutak posibilidade iha solusaun rua mak, governu konsidera sira prepara espasu ne’ebé natoon no sufisiente para sira kontinua halo atividade, se ida ne’e governu fasilita sira agradese, no se governu la fasilita, governu selu sira nia obra ne’ebé mak sira labele lori.
Prezidente Asosiasaun Arte Moris hato’o asuntu ne’e iha diskusaun nakloke ne’ebé organiza husi Asosiasaun Jornalista Timor-Lorosa’e (AJTL), hamutuk ho Koligasaun Agrikultura kona-ba asuntu rai, ekonomia no Orsamentu Jeral Estadu 2022, iha sede HASATIL, Farol, Dili.
“Iha ami nia kakutak posibilidade iha solusaun rua, ami lakohi osan husi Estadu, maibé ami entrega rai Estadu, estadu mós tenki selu fali ai-horis sira ne’ebé maka ami kuda durante tinan 18 ne’e ami nia direitu, ne’e la’os estadu nian, ami pintura obra ne’ebé haleu moru, ami labele lori, ho ami nia kakutak de’it mak pinta, ami priviléjiu uza fatin ne’e tempu naruk, maibé ami la husu osan para tau.” Hateten, Prezidente Asosiasaun Arte Moris, Iliwatu Danabere, Sabadu, 3/12.
Iliwatu dehan kriatividade ida, ne’e fatin la’os determinante, fatin ne’e priviléjiu boot para ita bele akomoda barak, fatin ne’ebé Arte Moris husu ne’e la’os ba fatin membru sira hela, maibé misaun ida fó edukasaun ne’e mak presiza duni espasu para kontinua fó edukasaun no galeria.
“Ami ezije mak halo diálogu buka solusaun, solusaun di’ak liu maka ami entrega estadu nia propriedade, estadu mós tenke kompensa fali ami nia sasán ne’ebé mak tau durante tinan hira ne’e, lalika selu ami tun sa’e fali, ami husu direitu saida mak ami nian.” Akresenta Iliwatu Danabere.
Nia realsa, Governu fó fatin ba Arte Moris muda fali ba armazein ne’e, Arte Moris la koopera duni, razaun tanba saida mak rejeita armazen tanba la’os ezije governu para prepara fatin, rekupensa de’it obra ka sasán sira ne’ebé rai durante tinan 18 husik arte moris ba mesak de’it, governu lalika ulun moras.
Iha Fatin hanesan Artista Melly Galaxy reforsa, se ita ko’alia atu koopera, se governu hakarak oferese fatin ne’e, fatin ne’ebé dignu, signifika katak, fatin Arte Moris ne’e eskola, para bele hatutan arte ne’e ba iha Timoroan, labarik ki’ikoan sira no se de’it, Arte Moris ezije fatin ne’ebé dignu.
Mely Galaxy subliña arte hanesan opsaun ida, se ita susesu eskolár iha eskola públiku sira ne’e, arte hanesan fatin ida para bele ba aprende.
