Reportajen Umbelina dos Reis
Asosiasaun Ex-Prisonérios Políticos (ASEPPOL) serbisu hamutuk ho Gabinete Apoiu sosiedade sivil (GASC) organiza mini semináriu ida ho tema “Memorizasaun nu’udar espasu tranzmisaun valorizasaun rezisténsia nian”, iha ambitu komemora loron memoria 7 Dezembru 1975, iha salaun antigu Komarka Balide.
Panelista daruak ba mini semináriu ne’e, Prezidente Komité 12 Novembru, Gregorio Saldanha “Mouris” hateten, tranzmisaun valorizasaun rezisténsia nian hanesan valor toleránsia, respeita ho domin. Toleransia ne’e ezije ba moris, ita nia estadu rekoñese ba rekonsiliasaun, tanba ita presiza unidade metin.
“Timor-Leste unidade nasaun iha, maibé armonia la iha, unidade nasaun iha tanba ita moris iha uma fukun ida deit”, hatete Prezidente Komité 12 Novembru, Gregorio Saldanha.
Gregorio hateten kooperasaun ita servisu hamutuk, se uluk valor la iha mak ita la manan funu, hadi’a nafatin ita nia rai doben, nia lembra nafatin membru RENETIL nia lia fuan, sira nia lema hateten katak, diak liu lakon sira nia estudu duke lakon ita nia rai, “se la’os ha’u, entaun se tan, se laos oin entaun bainhira los”.
Nia haktuir, arte marsiais tempu rezisténsia ne’e hamutuk, sai organizasaun ida de’it, joven rezisténsia uluk ne’e, sira utiliza kbiit jogu sira hodi manan duni funu, diferente mak ambiente, nusa mak ita inimigu fali ba malu, nia hatete loloos ita hamutuk hodi haburas no dezenvolve ita nia rai.
“Ita hotu hanoin prosesu la’o hela, rezolve oinsá transforma hanesan jogu desportu manan prémiu, orienta ba ema nia fíziku no mentalidade dixiplina”, tenik Nia.
