Reportajen Silvino Pereira
Universidade Katolika Timorense (UCT), Joao Paulo II fo tomada de posse ba Konsellu Universitáriu hamutuk nain 31.
Reitór UCT, Padre Joel Casimiro Pinto hateten Konsellu universitáriu ne’e hanesan asembleia ida ho nia funsaun atu halo aprovasaun ba programa ezekutivu nian.
“Reitór sei la halo aprovasaun no foti desizaun pesoál ba nia programa no atividade, ida ne’e sai hanesan asembleia ida iha konsellu ne’e, atu bainhira foti desizaun ruma, sei rona hotu sira nia ideia kritika no sujestaun” dehan Reitór UCT, Padre Joel Casimiro Pinto hafoin serimónia tomada de posse, iha Salaun Nobel da Paz UCT Balide, 14/12.
Nia hatutan eventu ida ne’e hanesan momentu istóriku ida estabelesimentu konsellu universitariu, katak UCT hahu halao ona ninia atividade akademiku.
“horseik Konsellu Ezekutivu sira Reitor, Vise-Reitor Pro-Reitor, kapelaun no administrasaun jeral hahu ona reuniaun ofisial, ohin konfirma liu husi konsellu universitariu ne’e fo hatene ona katak UCT hahu ona ninia moris no atividade hahu ona ohin” nia dehan.
Iha fatin hanesan Arsebispu Arkidioseze Metropolitana Dili, Dom Virgilio do Carmo da Silva hateten iha loron 8 halo ona lansamentu ba universidade no mos halo ona nomeasaun ba Reitór no nia ekipa.
“Durante loron hirak liu ba ne’e ekipa hirak ne’e halo servisu makaas, ohin ami halo tomada de posse kompletu katak hahu husi reitór, dekanu no konsellu universidade nian” Dehan Dom Virgilio ba Jornalista sira hafoin halo tomada de posse iha salaun Nobel da Paz UCT Balide.
Tuir Dom Virgilio hateten katak iha serimónia tomada de posse ne’e ba grupu 2 mak hanesan Reitor, vise-reitór, dekanu ho estrutura tomak no seluk fali mak nai-ulun, ex-titular, polítiku ho mos emprezáriu balun atu sai hanesan konselleiru universidade nian.
