Home Notisia OGE 2021, Oxfam Husu Investe Iha Merkadu Rural, Estrada Rural no Irigasaun

OGE 2021, Oxfam Husu Investe Iha Merkadu Rural, Estrada Rural no Irigasaun

742
0
Feto iha setor agrikultura iha Timor-Leste (Foto: Oxfam Timor-Leste)

Reportazen Francisco JDA     

Parlamentu Nasional (PN) oras ne’e dadaun debate hela Orsamentu Geral Estadu (OGE 2021, no Oxfam hatama nia submisaun ba PN husu tau orsamentu boot ba seitor agrikultura nune’e bele atinji agrikultor  sira. Presija duni investe liliu ba merkadu rural, estrada rural, no irigasaun. Oxfam husu atu halo hirak ne’e hotu ho perspetiva jeneru no inkluzaun.

Tuir Economic and Climate Justice Program Manager, Lucio Savio, iha konferénsia imprensa  hatete katak,  governu presija investe iha seitor agrikultura hodi diversifika ekonomia, no halo ekonomia sai sustentavel no inkluzivu. Presija fo apoio ba dezenvolve merkadu local no halo dezenvolvimentu sustentavel ho prespetiva sensivel jéneru, no inkluzivu ba ema ho difisensia.

“Iha tinan naruk nia laran governu nia foku mak ba mega projeitu sira. Oekusi no Suai sai foku ba governu nia investimnentu durante ne’e. Entaun ita hanoin katak presija diversifika dezenvolvimentu ne’e, tanba seitor rua ne’e la sustentavel  no sei la garante orsamentu iha future. Presija duni investe iha agrikultura, liliu ba merkadu rural, estrada rural, no irigasaun. Haree mos kona ba konektividade, oinsa maluk agrikultór sira lori sira nia produsaun ba too iha merkadu”, hatete Economy and Climate Justice Program Manager Lusio Savio iha Salun FONGTIL, 01/12

Halo referensia ba Relatorio TOMAK nian, Program Manager ne’e expresa katak 75% too 80% maluk feto sira mak uja merkadu ne’e hodi halo negósiu, faan sira nia produtu, mais merkadu la seguru ba maluk feto sira nia atividade negosiu. Presija governu nia polítika diak merkadu mak asesivel ba maluk feto sira.

Lucio Savio reforsa tan dehan OGE mak planea hea ba agrikultura seidauk naton. Atu rekupera ekonomia presija investementu ida forte.

“Liga ho orsamentu geral 2% tuir Oxfam nia hanoin ne’e seidauk natoon ba investimentu seitor agrikultura. Refere mos ba planu rekuperasaun ekonomia ne’ebe hatete katak, agrikultura ida forte sai xave ba hadia seguransa ai-han no proteje  ekonomia hosi krize iha future. Krize balun ne’ebe karik ita la espekta, tan n’e importante mos atu hahú investe ona maibé iha realidade governu tau 2% deit. Ami hanoin ne’e la too ba  seitor agrikultura,” Lucio Savio hatutan.

Program Manager ne’e dehan katak governo seidauk iha planu ne’ebe fixo atu investe iha seitor agrikultura. Governu presija investe nune’e bele provoka komunidade sira atu prodús, tanba dalaruma komunidade prodús mas la iha merkadu. Entaun komunidade bele hanoin katak diak liu han deit tanba lori ba merkadu dalan at, produsaun depende ba udan been tanba la iha irrigasaun neebe mak diak.

LEAVE A REPLY

Please enter your comment!
Please enter your name here