Reportajen Santina Lucia da Costa
Prezidente Republika, Dr. Francisco Guterres Lú Olo, halo enkontru ho Frente Mudansa (FM) hodi rona opiniaun molok dekreta eleisaun Prezidensial, FM sujere dekreta data eleisaun Prezidensial iha meadus Janeiru.
Hafoin enkontru ba jornalista sira, Vise-Prezidente no Prezidente Interinu Frente Mudansa (FM), Egidio de Jesus, hateten, Prezidente Republika konvida partidus politikus hotu, hodi konvoka reuniaun ho partidu Frente Mudansa, hodi rona partidus politikus hotu tuir mandatariu konstituisaun RDTL ne’ebé entermus alinea C, artigo 86, hateten, Markasaun data fiksa ba eleisaun prezidensiál.
Vise-Prezidente no Prezidente Interinu Frente Mudansa (FM), Egidio de Jesus, dehan, FM sujere iha fulan meadus janeiru nia laran dekreta ona data fiksa ba eleisaun prezidensial.
“Partidu Frente Mudansa sujere iha fulan meadus janeiru nia laran dekreta ona data fiksa ba eleisaun prezidensial. Eleisaun primeira ronde ami mós fó sujestaun politika maibé ne’e la’os permanente ne’e knár Prezidente Republika nian ami sujere ba meadus de Marsu ne’e ba atu kampaña ka eleisaun, se tuir mai iha fali ronde segundu, ita sujere ba meadus de Abril para realiza fali eleisaun refere, tanba ezatamente loron 20 Maiu 2022, bele ona selebra serimonia soleni kona-ba tomada de posse ba Prezidente Republika foun.”Rekomenda, Vise-Prezidente no Prezidente Interinu FM, Egidio de Jesus iha Palasiu Prezidensiál Nicolau Lobato, Bairu-Pite, 6/01.
Kona-ba kandidatura eleisaun Prezidensial, Egidio de Jesus afirma sei buka manu aman ou manu inan ruma, hodi kompete iha eleisaun prezidensial, maske rekoñese derota dala rua ona sira nia kandidatu Dr. José Luis Guterres Lugu.
“Ami iha esperiensia iha rotrosesu dala rua, hau mos ohin aprezenta ba nai prezidente republika, uluk ami nia eis-Prezidente Dr. Jose Luis Guterres Lugu ba dala rua, ami gagal tiha, “A esperiensia e uma professor”, ne’ebe ami sei reuni fali ami nian, diresaun nasional to’o ba baze para iha konferensia nasional ida, bainhira Prezidente Republika dekreta ona lei, para ami bele buka took manu inan ka manu aman ida ne’ebe prontu atu ba.” hateten, Egidio de Jesus.
