Reportajen Joselina dos Santos
Joven kriativu no produtivu husi Ermera Ai-Kolár Mutin Orgánika (EAMO), Januario Goncalves husu ba Parlamentu Nasiónal tenke halo fiskalizasaun ida di’ak, atu uza osan Orsamentu Jerál do Estadu ho montante Biliaun $1.949 ho efetivu no bele fo rétornu diak ba estadu, liu-liu ba investimentu kiik sira no ba agrikultór sira, tanba tuir dadus maioria populasaun moris agrikultor
“Se ita la halo ida ne’e, ha’u hanoin katak ita rasik mak hakarak dudu ita nia joven sira ba situasaun ne’ebe ladi’ak, tanba importante liu investe ba joven produtivu sira nebe’e halao knaar iha setór produtivu sira”, dehan Januario iha Media Center Koligasaun Agrikultura HASATIL, 28/01.
Nia dehan hanesan joven agrikultura, sira bele haree katak Orsamentu ne’ebe aprova iha Parlamentu Nasionál ho valor boot, governu tenke ho nia kompromisu diak ba estadu.
“Ha’u sei relembra kompromisu husi Ministru Agrikultura no Peska, Pedro Reis ne’ebe halo enkontru ho ami hatete katak, dezenvolvimentu ne’e hahú husi baze, ho program povu kuda governu sosa, maibe nu fin ita haree katak povu kuda, Governu halai fali ba loja sira, klaru katak governu la tuir saida mak sira koalia,” nia hatete.
Nia dehan governante sira nafatin ho retórika, atu hafalun de’it ema nia konfiansa iha públiku, maibe pratika iha nasaun ne’e zero, tanba la garante ba agrikultór sira nia moris.
“Entaun ita hanoin katak Timor mos riku, tanba poténsia barak loos mak joven sira agora hahú hela, ita bele dehan osan ho montante, maibe ita so haree deit iha kapitál dezenvolvimentu”, dehan Joven produtivu ne’e
Grupu EAMO rekomenda ba kandidatu sira ne’ebe sei kompete iha eleisaun prezidensiál atu prepara-an ba halo kampaña, atu toka programa sira ne’ebe fo benefísiu ba povu, labele insulta iha públiku, labele uza sosial media hodi divulga informasaun ne’ebe la edukativu no informasaun falsu, tanba bele fo impaktu ba ami nia produtu sira ne’ebe sei laiha folin.
