Reportajen Santina Lucia da Costa
Kandidatu Prezidente Repúblika, Númeru sorteiu 12, Virgílio da Silva Guterres “Lamukan” hateten povu labele sai vítima ba dezenvolvimentu, povu tenke sai sujeitu, povu labele sai atan ba lei, lei ita halo atu serbí povu.
“Hau dehan, povu labele sai vitima ba dezenvolvimentu, povu tenki sai sujeitu, povu labele sai atan ba lei, lei ita halo atu sai serbi povu. Estadu iha responsabilidade atu garante asesu ba ninia populasaun, asesu ba informasaun,transporte publiku, no merkadu, tanba sosiedade nia moris ne’e depende ba ninia atividade ekonomiku.” hateten, Kandidatu Prezidente Republika, Númeru sorteiu 12, Virgilio da Silva Guterres “Lamukan iha Bairu Aetul, Mundu Perdidu, ossu, Munisipiu Viqueque, 5/3.
Virgilio da Silva Guterres “Lamukan”, afirma, Infraestrutura dalan oinsa tau atensaun ba povu nia moris di’ak, iha Konstituisaun Artigo 6 koalia kona-ba objetivu estadu ninian, iha ida koalia kona-ba promove dezenvolvimentu ida ne’ebé armoniozu no integradu iha setór.
“Setór dezenvolvimentu armoniozu ne’e, sé hau hatene karik, sé ita halo dalan, dalan ou luron estrada ne’e la’os fó benefisiu de’it ba ema ne’ebé ké lori kareta ne’e, maibé mós fó benefisiu ba ema ne’ebé hela iha estrada ninin, katak nia bele asesu ba transporte, agrikultór sira lori sira nia produtu lokál ba merkadu.” dehan, Lamukan.
Nia hatutan, Armoniozu ida mós katak, tenki respeita ita nia ambiente, uluk ne’e iha ita la’o iha estrada, iha estrada ninin ne’e iha sabraka aifuan oioin, depois kuda aifunan roza ne’e iha dalan sira ne’e iha, maís agora ai sira laiha ona, ai nia abut sira labele kaer ona rai, rai komesa monu, ida ne’e ida ne’e dezenvolvimentu la armoniozu.
Kandidatu Prezidente Republika, Númeru sorteiu 12, hateten, Jere orsamentu Jeral Estadu (OJE), primeiru atu sai Prezidente Republika, mensajen ba Governu mak poupa osan, labele gasta arbiru de’it, bainhira ita poupa osan ne’e ita salva futuru nasaun nian, ita lakohi para osan ita hetan agora ne’e gasta ba agora kedas, entaun jerasaun sira mai ne’e lee de’it istória.
“Hau nia rekomendasaun ba governu mak, poupa osan, poupa osan liuhusi Ministeriu labele barak demais, rai ki’ikoan ida ne’e Ministeriu de’it 40 no 50 ne’e atu halo saida, la halo serbisu buat ida, durante tinan 20 ne’e ita halo Ministeriu ne’e la’os atu responde ba nesesidade povu nian.”akresenta, Lamukan.
Nia realsa poupa osan liu husi redús Ministériu, redús mákina estadu nian boot demais, Ministru de’it hotu ona, lalika iha vise-ministru no sekretariu estadu, Ministru de’it tun mai, Diretór Jerál iha ne’eba ona para halo serbisu, tanba pozisaun politik iha ne’eba ne’e lor-loron politik hela de’it, ita labele fó han povu ne’e ho politika de’it, tenki ho serbisu, entaun osan jere iha ne’e.
