Reportajen Umbelina dos Reis
Sekretáriu Estadu Formasaun Profisional no Empregu (SEFOPE), liu husi Diresaun Nasional Empregu Exterior (DNEE), realiza serimónia abertura orientasaun preliminary treating durante loron 9 ba kandidatu traballador Timoroan na’in 136, ne’ebé kontratu tama ona atu ba servisu iha Korea du Sul, Segunda ne’e iha Salaun Sentru Formasaun Senai, Becora (28/03).
Diretor diresaun DNEE, Filomeno Soares hato’o katak, metas anual ne’e kada tinan sempre haruka traballdor ba Korea maximu 1000, nia dehan husu ba traballadór sira osan ne’ebé mak prepara ne’e 4000, atu investe ba Korea du Sul tanba prosesu atu ba Korea ne’e difisil no kleur ona.
Nia hatete, Korea du Sul nia kritéria husu mai ita Timor mak programa preliminary treating atu fo matéria balun ke ita presija orienta ba traballador sira para komprende tanba nasaun Korea du Sul ho Timor la hanesan, ita presija fo hanoin ba traballador sira wainhira aranka ba Korea du Sul, durante tuir orientasaun loron 9 iha fatin ida ne’e.
Nia akresenta, agora ne’e da-dauk SEFOPE prepara hela traballdor sira nia kontratu no asina ona maibé lista ne’ebé mak tama husi Korea du Sul mai ne’e depende ba empregador sira, ida ne’ebé mak ba uluk no ida ne’ebé mak ba tuir ne’e depende husi Korea mak haruka mai. Diretor ne’e hatete, durasaun traballador sira ba servisu iha Korea du Sul ne’e mínimu durasaun tinan 3, maximu durasaun tinan 4, depois de remata kontratu mak sira sei fila-fali mai Timor.
“Atividade ohin nian ne’e atu prepara ita nia traballador sira ba servisu iha Korea du Sul. Tanba ambiente iha nasaun Korea du Sul diferente ho nasaun Timor-Leste, entaun ne’e rekejitu ne’ebé mak Korea du Sul informa mai ita atu halo preparasaun” esplika Diretor DNEE Filomeno Soares.
Diretor ne’e mos informa hosi Janeiru to’o Marsu tinan 2022, SEFOPE haruka ona traballador sira ba nasaun Korea hamutuk 280, ne’ebé aranka ona dala haat. Nia dehan total traballador ne’ebé tuir orientasaun preliminary treating durante loron 9 ne’e, mane ema na’in 132, feto na’in 4, hamutuk 136, ne’ebé sira sei destaka ba iha área Peskas no Fábrika.
Iha fatin hanesan, Diretor Interinu Sentru Formasaun Senai, Becora, Fernando de Araujo informa katak, tinan-tinan formador sira fo formasaun ba formandu sira kuaze ema rihun no simu sertifikadu maibé hasoru problema nafatin tanba ita la iha kampu de traballu ida serteza para bele tama ba serbisu, maibé ohin ita boot sira hetan oportunidade ida boot tebe-tebes no joven barak agora buka serbisu iha Timor maibé seidauk hetan.
Nia dehan, buat ne’ebe maka importante tebes mak disiplina tanba ita nia situasaun Timor la hanesan ho nasaun Korea du Sul no Austrália ka nasaun sira seluk, tanba ne’e nia husu traballador sira atu nafatin hatudu disiplina servisu iha ema nia rai, tanba sira reprezenta nasaun doben Timor-Leste.
“Tanba sira nia nasaun importante liu maka ita nia disiplina no hatudu ita performe ne’ebé di’ak, tama ho oras sai ho oras, badinas halo serbisu, ida ne’e maka importante no save ba ita nia susesu. Tanba ne’e ha’u fiar katak imi na’in hirak iha ne’e sei susesu. Governu hanesan ohin Diretor hatete sei nafatin tau matan ba ita boot sira no kontrola ita boot sira bainhira ita boot sira sai husi ne’e to’o iha fatin serbisu iha situsaun saída de’it,” dehan Diretor Interinu Fernando iha Salaun Senai, Becora.
