Reportajen David da Costa Gusmao
Tuir observasaun hosi Komisaun Nasionál Elisaun (CNE), katak abertura kampaña segunda volta, hosi kandidatu Prezidente Republika (PR) ho númeru sorteiu 2, Dr. Francisco Guterres Lú Olo, iha Gleno Munisipiu Ermera lao di’ak tebes, no laiha liafuan kroat no insulta malu husi kandidatu ne’e.
Observadór CNE nian iha munisipiu Ermera, Domingos Barreto informa kampaña abertura kandidatu PR Francisco Guterres Lú Olo ho númeru sorteiu 2, iha Gleno munisipiu Ermera laiha liafuan ne’ebé maka kroat, hanesan iha kampaña primeira ronde nian.
“Hau hanoin kampaña ne’e lao ho di’ak tebes, CNE la identifika liafuan insulta malu,” dehan observadór Komisaun Nasionál Elisoens (CNE) nian, ba jornalista sira iha kampu futeból, Gleno, Sabadu 2/04.
CNE espera katak ba oin mós, halo kampaña iha ne’ebé deit, bele mantein nafati, kuidadu nafatin liafuan kroat, liafuan ne’ebe insulta malu, no soran povu atu labele mosu dezorganiza iha territóriu Timor laran tomak.
Nune’e mós iha kampaña ne’e husi parte CNE la haree labarik sira ba partisipa iha kampaña abertura ne’e, no mós la haree ema ruma uza viaturas estadu nian iha kampaña ne’e.
“Iha kampaña abertura ne’e ami la dun haree labarik sira, depois uza viatura publiku nian mós ami la haree, laiha kareta ho motor ruma estadu ninia ne’ebé maka uza mai iha kampaña ida ohin ne’e, ami CNE la identifika ida ne’e,” nia afirma.
Tuir observasaun jornalista Neon Metin iha kampaña abertura kandidatu Prezidente Republika númeru sorteiu 2, Francisco Guterres Lu Olo, lao ho diak, no hetan seguransa maximu hosi Polisia Nasionál Timor-Leste (PNTL).
