Reportajen David da Costa Gusmao
Primeiru Ministru (PM), Taur Matan Ruak husu ba traballadór timoroan, ne’ebe atu ba servisu iha Koreia, banati tuir ema nia regras, tanba ema serbisu dixiplina no serbisu makaas, transforma sira nia mental no transforma sira nia vida.
“Hau vizita Koreia ema ne’ebá dixiplina makaas, serbisu makaas, transforma sira nia mental no transforma sira nia vida, ida ne’e sai ezemplu ida ita bele banati tuir. Maibe sira mós iha moto ida baibain sira uza, toba tarde hader sedum,” dehan PM Taur, iha Salaun Hotel Timor Lodge, bainhira serimónia despedida no asina deklarasaun entre família traballadór ho SEFOPE, konaba traballadór timoroan na’in 87 ne’ebe atu ba servisu iha Korea, Seta 6/05.
Xefe Governu ne’e haktuir sei tau matan nafatin ba traballadór sira, no akompaña traballadór sira nia serbisu iha ne’ebá.
“Espera sira nia hases an husi imi, ne’e sai papél ida ida-ke posetivu, laos negativu, sei ajuda imi,” Nia dehan
Alende ne’e mós Taur dehan hakarak lori Timor ba oin, no hahu hadia moris uluk, se moris ne’e la muda maka sei la muda Timor-Leste ne’e.
“Se hakarak lori Timor ba oin, dudu Timor ba oin, ita hahú muda uluk ita nia-an, se ita la muda ita nia-an maka ita la muda Timor,” Tenik Taur.
Nia husu ba traballadór sira katak, ba sei hetan rai foun, ema foun, hahalok foun, hahan foun, lisaun foun no situasaun foun. Tanba ne’e mudansa ida-ke boot, maibe iha traballadór barak desde 2009 sira hatudu kapasidade, adapta-an no mudansa ne’e.
