Reportajen David da Costa Gusmao
Governu liuhosi reuniaun Konsellu-Ministru aprova ona projetu Dekretu-Lei ne’ebé aprezenta husi Vise-Primeira-Ministra no Ministra Seguransa Sosiál no Inkluzaun, halo ba alterasaun datoluk ba Dekretu-Lei n. 55/2020, loron 28 fulan-outubru, ne’ebé aprova konstituisaun Fundu Rezerva Seguransa Sosiál no definisaun ba modelu jestaun ida-ne’e.
Prota Voz Governu, Ministru Prezidénsia Konsellu Ministru, Fidelis Manuel Leite Magalhães dehan ho alterasaun ida-ne’e, define konseitu jestaun operasionál no permite katak Fundu Rezerva Seguransa Sosiál, diretamente, ka liuhusi Banku Sentrál Timor-Leste ka entidade públika seluk, ne’ebé responsavel ba jestaun operasionál, bele uza kontratasaun ka subkontrasaun husi entidade sira seluk hodi asume funsaun espesífika balu ne’ebé inklui iha jestaun operasionál Fundu nian.
“Aleinde ho alterasaun ida-ne’e, klarifika katak ativu sira ne’ebé sei integra iha karteira Fundu Rezerva Seguransa Sosiál nian tenke emite husi entidade sira ne’ebé la aprezenta risku substansiál inkumprimentu, atu garante seguransa ba Fundu ne’e rasik, ho maksimizasaun rendimentu nian no minimizasaun risku nian,” esplika Ministru Prezidénsia Konsellu Ministru, Fidelis Manuel Leite Magalhães iha Palásiu Governu, Tersa 17/05.
Nune’e mós halo aprezentasaun tan projetu Dekretu-Lei tolu, husi Vise-Primeira-Ministra no Ministra Seguransa Sosiál no Inkluzaun ba Projetu substituisaun SAII husi pensaun sosiál ida ba invalidés no vellise.
“Ho alterasaun lejizlativa ida-ne’e pretende alterasaun sira tuirmai ne’e, Muda konseitu, subsídiu ba pensaun nian, Altera ámbitu pesoál, inklui traballadór sira ne’ebé iha sistema kontributivu, maibé la iha direitu ba pensaun, Valór prestasaun, ne’ebé garante katak montante pensaun la ki’ik limiár internasionál probreza nian, La akumula ho rendimentu seluk, Prioridade husi pagamentu sira, ne’ebé halo pagamentu semestrál ba pagamentu mensál,” Nia esplika.
Nia haktuir projetu ne’ebé estabelese valór mínimu sira ba pensaun mínima invalidés no vellise nian husi rejime kontributivu, Objetivu husi proposta ida-ne’e mak atu garante pensaun mínima ida, tuir karreira kontributivu traballadór sira nian.
“Projetu kriasaun Servisu Verifikasaun Inkapasidade sira, Objetivu husi projetu ne’e mak atu kria servisu ida ne’ebé bele sertifika situasaun sira inkapasidade ba serbisu nian, atu bele atribui prestasaun sosiál sira.” hakotu nia.
