Reportajen David da Costa Gusmao
Governu liuhosi reuniaun Konsellu-Ministru aprova ona Projetu Dekretu-Lei, ne’ebé aprezenta husi Ministru Edukasaun Juventude no Desportu (MEJD), Armindo Maia kona-ba medida apoiu ba Estabelesimentu Edukasaun pré-eskolár, ensinu báziku no sekundáriu públiku.
Partikulár ne’ebé integra iha rede oferta servisu públiku ba asesu internet, atribuisaun bolsa ba alunu sira ne’ebé di’ak liu no implementasaun projetu pilotu “eskola iha uma ka homeschooling” nune’e mós finansiamentu estudu viabilidade husi estabelesimentu eskola raiz.
“Ho projetu Dekretu-Lei ida-ne’e estabelese apoiu ida ba asesu ba internet, liuhusi pagamentu husi Estadu kustu instalasaun no manutensaun ligasaun ba internet husi parte dosente no alunu sira iha estabelesimentu ensinu báziku sentrál (EBC) no Sekundáriu Jerál no Tékniku-Vokasionál hamutuk 1008, nune’e mós kustu ho tráfgu internet,” dehan Ministru Prezidénsia Konsellu Ministru, Fidelis Manuel Leite Magalhães iha Palásiu Governu, Tersa 17/05.
Nia haktuir projeitu ne’e apoiu mos bolsa ida ba alunu ne’ebé di’ak, ne’ebé konsiste iha atribuisaun valór pekuniária, sira ne’ebé montante determina husi Diploma Ministeriál, ne’ebé dirije ba alunu hamutuk 5837.
Finansiamentu husi projetu “Eskola iha Uma ka home schooling”. Finansiamentu ida-ne’e destina atu hatán ba despeza sira kona-ba rekrutamentu, kontratasaun no formasaun profesór sira, ho akizisaun materiál didátiku-pedagójiku sira no ho prosesu monitorizasaun no avaliasaun.
“Prevee katak projetu pilotu ne’e, iha Dili, inklui kontratasaun ba profesór hamutuk 442, ne’ebé sei atua iha aldeia 222. Apoiu ida-ne’e inklui tan apoiu ba Biblioteka Móvel no ba formasaun profesór sira, ho estudu viabilidade ba estabelesimentu Eskola Raiz,” Dehan Fidelis.
