Reportajen Francisco JDA
Centro Nasional Chega! I.P. (CNC) hamutuk ho G7+ realiza seminar nasionál, ho tema “Dalan Naruk ba Rekonsiliasaun iha Timor-Leste” iha ámbitu aniversáriu relatóriu Chega! Ba dala 16, ho objetivu atu bele hetan idea perspetiva hosi oradór sira iha rai laran, hanesan partidu polítiku inklui mos oradór hosi rai liur Ruanda Áfrika, atu nune’e sira bele fahe esperiénsia oinsá mak bele halo rekonsiliasaun, no atu ajuda CNC hodi bele buka mekanizmu propoin ne’ebe bele uza atu implementa iha Timor Leste.
Diretór Operasionál G7+, Felix Piedade ba Neon Metin hateten katak, semináriu ohin ne’e kolabora diak tebes entre CNC no G7+ atu nune’e bele hetan idea perspetiva no mekanizmu oinsa mak bele implementa, no prontu atu suporta nafatin CNC hodi promove rekonsiliasaun iha Timor Leste, nune husu atu labele muda pasadu, maibé muda futuru atu nune’e konflitu pasadu labele akontese tan.
“Ita labele muda pasadu maibe muda futuru, ita labele haluha pasadu ne’ebe akontese iha uluk maibe ita lakohi pasadu ida la diak ne’e atu akontese iha futuru, tanba ne’e ida mak ami halo ona depois ami sei hare no espera katak diskusaun loron ohin nian, ita bele hetan idea foun ruma hosi oradór no bainaka hosi Ruanda, para bele ajuda no dezenvolve saida mak ita bele halo” hatete Diretór Operasional G7+ Felix Piedade iha CNC, Balide, 27/10
Nia subliña kona ba rekonsiliasaun mak iha ona, hosi semináriu ne’e epera katak bele hetan idea foun hodi bele implementa atu nune’e bele sai matadalan no G7+ prontu atu suporta CNC para bele promove rekonsiliasaun iha Timor Leste
Entretantu Diretor Centro Nasional Chega! I.P, Hugo Maria Fernandes iha diskursu hatete katak, iha tinan 2005 relatoriu Comisaun Amizade Verdade Rekonsiliasaun (CAVR) rekomenda atu estadu Timor Leste ho partidu polítiku istóriku sira hahú deskute mekanizmu rekonsiliasaun entre komunidade Timor oan, ho nune’e entidade rua CNC no G7+, hodi prezerva memória paz no rekonsiliasaun laos deit iha rai laran maibe fahe mos eperensia Timor nia ba rai liur
“Ita hotu iha ne’e atu fo sentidu ba rekomendasaun Chega! no mos ita tenki tane duni komunidade nia lia menon ne’ebe hatete katak maske konflitu ne’e hotu tiha ona iha tinan 46 liu ba maibe komunidade iha ne’eba seidauk sente buat ida, ohin ita hamutuk iha ne’e atu koalia kona ba mekanizmu ne’ebe diak liu hodi hatán ba komunidade nia preokupasaun” hatete Hugo Maria Fernandes.
