Reportajen David da Costa
Prezidente Repúblika (PR) José Ramos-Horta, nia seidauk halo desizaun kona-ba lista indultu inklui eis Padre Ricard Daschbach ne’ebé Governu aprezenta ona ba xefe estadu, tanba nia sei estuda no sukat didi’ak rekomendasaun hotu antes foti desizaun finál.
Prezidente Ramos-Horta, hatete, katak seidauk halo desizaun kona-ba lista indultu ne’ebé simu ona hosi Governu, tanba seidauk iha nia meja atu estuda Didi’ak. iha lista ne’ebé hamutuk ema na’in 30 to’o 40, nune’e nia seidauk hatene karik eis Padre Ricard Daschbach tama iha lista refere.
“Ha’u seidauk halo desizaun ruma, hanoin aban ka bainrua karik, tempu laiha haree. Simu ona lista mais seidauk iha ha’u nia meja leten atu haree. Ha’u la lembra ema na’in 30 ka 40, nune’e ha’u la hatene iha lista ne’e eis Padre Ricard Daschbach, tanba ha’u seidauk haree lista ne’e,” dehan Prezidente Ramos-Horta ba jornalsita sira, iha okaziaun Selebrasaun Aniversáriu ba dala-24 Restaurasaun Independénsia TL, iha Tasi-Tolu, Kuarta 20/05.
Tanba ne’e, nia sei estuda no konsidera didi’ak mensajen hosi Igreja no sosiedade sivil molok halo desizaun, tanba nia preokupasaun la’ós de’it kona-ba eis Padre Ricard Daschbach, maibé mós kona-ba povu ki’ik iha Gleno, Bekora no Suai.
“Asuntu balun ha’u iha dúvida ha’u husu to’ok iha Igreja, laiha dúvida konsulta. Sosiédade sivil lubuk ida hakerek karta mensajen oi-oin ne’e mós ha’u lee, estuda, tanba ne’e mak ha’u sei demora loron ruma atu halo desizaun,” nia dehan.
Nia subliña “Ha’u nia preokupasaun la’ós de’it eis Padre Ricard Daschbach, ha’u nia preokupasaun ema kiik iha Gleno, Bekora, Suai”.
Tanba Governu sukat didi’ak ona lista indultu ne’e, maibé to’o agora nia seidauk halo desizaun tanba seidauk haree diretamente lista refere. Tanba ne’e, desizaun final sei fó sai ba públiku bainhira nia termina analiza dokumentu ne’e.
Tribunal Oecusse Kondena Richard Daschbach Kadeia Tinan 12
Antes ne’e, Tribunal Distritál Oecusse (TDO), liu hosi desizaun final. iha fulan Dezembru tinan 2021, kondena eis Padre Richard Dasbach, tenke kumpre kadeia tinan 12, tanba nia involvimentu ba krime abuzu sexual menớr no pornografia infantil, tuir prosesu iha loron 07 fulan-Setembru 2020, prosesu NUC 0022/19.PGGCC,
Akuzasaun ne’ebe Tribunal fo ba eis Padre Richard Dasbach hosi Estadus Unidus Amerika (EUA) hamutuk tinan 30, bazeia ba leitura akordaun hosi Juiz Yudit Pamungkas, maibe ikusmai deside kadeia tinan 12, tanba haree mos ba idade inklui kondisaun fíziku hosi lezadu.
