Reportajen Santina Lucia da Costa
Partidu Frente Revolusionariu do Timor-Leste Independente (FRETILIN) simu hikas Prezidente Partidu, Dr. Francisco Guterres Lú Olo kontinua vida polítika Partidaria no fó sertifikadu rekoñesementu ba membru Komité Sentral Fretilin (CCF) Segunda Jerasaun, Lere Anan Timur.
Iha selebrasaun Aniversariu ba dala-48 ba ezisténsia fundasaun ASDT/FRETILIN ne’ebé mak hala’o iha Sede Komite Central FRETILIN (CCF) Comoro, Dili. FRETILIN, simu fila fali Prezidente Francisco Guterres Lú Olo mai vida polítika partidaria hodi asumi fila fali ninia kna’ar nu’udár Prezidente FRETILIN.
Iha okaziaun hanesan, FRETILIN mós fó sertifikadu Rekoñesimentu no entrega kartaun membru ba Lere Anan Timur nu’udár membru segunda jerasaun Komite Central FRETILIN.
Iha selebrasaun ne’e, Sekretariu Jeral FRETILIN, Dr. Marí Alkatíri hateten sente kontente tanba bele simu fila-fali Prezidente partidu FRETILIN, Lú Olo no nia kontente liu tan tamba bele simu fila-fali Lere Anan Timur iha uma lulik ida ne’e, uma lulik ne’ebé reprezenta, ran ho ruin, isin sira ne’ebé mak naklekar iha Timor laran tomak.
“Loron ohin ne’e importante tebes ba FRETILIN nia vida. Hahu husi ne’e ba oin, hau dehan, Mean hamrik metin. Ida ne’e mak ita hakarak duni, mean ho modok ho kor oioin hamrik hamutuk.” Hateten, Sekretariu Jeral partidu FRETILIN, Marí Alkatíri iha sede CCF, Comoro, Dili, 20/5.
Sekretariu Jeral FRETILIN, haktuir mós katak tuir lolos rekoñesimentu ba kamarada Lere Anan Timur halo tiha ona iha tinan-2015, maibé tamba nia sei jeneral la konsege.
“Biar hanesan Jenerál, Kamarada Lere Anan Timur nunka nega katak nia FRETILIN. Tamba ne’e nia mai iha ninia uma rasik. Tuir rezolusaun polítika nasionál ninia atu halo rekoñesimentu ida ne’e, ba kamarada Lere, Lolos rekonesimentu ida ne’e halo ona iha tinan-2015, maibé tamba nia sei Jeneral, ami rai tiha dokumentu sira ne’e.”Akresenta, Marí Alkatíri.
Dr. Marí dehan husi ne’e ba oin iha prosesu barbarak, iha prosesu internu FRETILIN nian rasik para atu renovasaun mandatu. Komisaun Politika nasional nia desizaun propoin ba Prezidente Partidu FRETILIN Lú Olo konvoka ba komite sentral iha loron 28-29 Marsu tinan ida ne’e.
“Hau hanoin to’o ona tempu atu FRETILIN hamrik metin duni, hau la mesak ona, loron ohin importante tebes ba FRETILIN atu la’o ba oin. Hau fiar atu konsege duni halibur ita hotu, husi ne’e ba oin FRETILIN sei menan iha tinan 2023.” realsa, Marí.
Nia Subliña, Husi ne’e ba oin ita sei hetan kontribuisaun importante para hametin liu tan FRETILIN, kontribuisaun nia naran mak Lere Anan Timur.
Koalia iha resesaun ne’e, Prezidente Partidu FRETILIN, Francisco Guterres “Lú-Olo” agradese apoiu hotu ne’ebé mak FRETILIN nia lideransa, militante no simpatizante sira, no povu tomak fó ba nia durante ninia mandatu hanesan Prezidente da Repúblika.
“Tinan hirak liu ba hau sai husi uma ida ne’e ba kumpri misaun boot ida. Ohin, hau fila fali mai uma lulik ida ne’e. Ha’u mai fali, ita hotu hamutuk atu hametin liu tan FRETILIN.”Hateten, Lú Olo.
Entretantu hafoin simu tiha sertifikadu rekoñesimentu no kartaun membru nian, membru CCF Segunda Jerasaun Lere Anan Timur hateten, Ho honra boot tebes, bele fila-fali mai hamutuk ho kamarada sira hotu, halibur hamutuk iha uma lulik ida ne’e, sede Komite Central FRETILIN. Uma lulik ida ne’e la’os foun, husi villa muda ba foho, husi foho muda fali mai villa, tamba FRETILIN la kotu, nunka kotu, nunka lakon iha dalan klaran biar iha situasaun difisil nia laran.”
Lere Anan Timur hatutan, mai atu serbi FRETILIN no sei serbisu hamutuk ho lideransa, kuadru, militante sira no ema hotu atu halo FRETILIN hamrik metin, haforsa no lori FRETILIN ba vitória.
“Ha’u mai atu serbi partidu, atu serbi Estadu. Hau mai laos atu sai opozisaun ba kualker kamarada ka lider ida.´Dehan Lere.
Alende resesaun ba Prezidente Lú-Olo no entrega sertidaun ba Lere Anan Timur, FRETILIN mós halo lansamentu ba portal partidu nian, fretilin.tl https://fretilin.tl/
Tuir observasaun Jornalista Neon Metin, katak, iha Sede CCF militante no simpatizante entuziazmu simu Prezidente Partidu FRETILIN, Francisco Guterres Lú Olo, ho Membru CCF segunda Jerasaun, Lere Anan Timur. no depois kanta múzika partidu Foho Ramelau, Lere Anan hamonu matan-been iha CCF.
