Reportajen Santina Lucia da Costa
Membru Komité Sentral FRETILIN (CCF) Segunda jerasaun, Lere Anan Timur, deklara katak, mai fali uma lulik FRETILIN tanba hakarak serbi partidu no la’os mai atu sai opozisaun ba lider ida. Tenki hadomi partidu nu’udar aan rasik.
Iha Ambitu selebra aniversariu ezistensia ASDT/FRETILIN ba dala-48, Membru CCF Segunda Jerasaun, Lere Anan Timur, informa, mai atu serbi FRETILIN no sei serbisu hamutuk ho lideransa, kuadru, militante sira no ema hotu atu halo FRETILIN hamrik metin, haforsa no lori FRETILIN ba vitoria.
“Ha’u moris nanis kedas ho uma lulik ida ne’e. Uma lulik ida ne’e husi villa ba ai-laran, husi ai-laran fila mai vila. Hau mai atu serbi partidu, atu serbi Estadu. Hau mai la’os atu sai opozisaun ba kualker kamarada ka lider ida, hau mai la’os buka naran, maibé hau mai atu serbi, hau nia dever obrigasaun serbi FRETILIN, Tanba ema barak mate tan FRETILIN. La’os hau mai atu serbi hau nia interese.”Hateten, Membru CCF Segunda Jerasaun, Lere Anan Timur iha CCF, Comoro, Dili, 20/5.
Lere Anan Timur, Afirma, Povu Maubere nafatin sasin ba FRETILIN ba Istória nu’udar matadalan iha funu naruk nia laran ba libertasaun nasional. FRETILIN mak matadalan FALINTIL mak liman kroat ba libertasaun povu maubere nian. FRETILIN ho FALINTIL mak esparansa povu maubere ba ninia vitoria.
Lere dehan mi hamutuk ho Prezidente Partidu FRETILIN, Lú Olo ho Sekretariu Jerál, Marí Alkatíri ho Kamarada sira hotu, hakarak hametin ka haforsa ita nia partidu FRETILIN, hamutuk hadi’ak naksalak ruma.
“Tenki Hadomi partidu hanesan hadomi hau nia-an, hatene hadomi no respeita iha partidu laran, halakon arogansia, egoizmu, odi vigansa.” Subliña, Lere Anan Timur.
Lere Anan Timur, konsidera Marí Alkatiri nu’udar fundadór partidu tuir kultura funu, tuir kultura Ai-Laran. Marí Alkatíri nu’udar fundadór no Sekretariu Jeral Partidu FRETILIN, tenke sai aman ba partidu, sai aman ba nasaun, aman ba kuadrus militantes hotu iha partidu FRETILIN nia laran, no aman mós ba partidu hotu-hotu ne’ebé iha Timor, tanba FRETILIN mak knua, uma lisan, ba partidus hotu-hotu. Agora tanba demokrasia liberdade ida-idak harii partidu, oan barak ida-idak harii ninia uma-kain maibé objetivu ida de’it, serbi povu no serbi nasaun.
Membru CCF segunda Jerasaun, hatutan, uma lulik ida ne’e laos foun, husi vila muda ba foho, husi foho muda fali mai vila, tamba FRETILIN la kotu, nunka kotu, nunka lakon iha dalan klaran biar iha situasaun difisil nia laran.
Lere Anan Timur mós fó parabens ba Prezidente FRETILIN Lú-Olo no Sekretariu Jeral FRETILIN, Mari Alkatiri. Nia dehan, “Tamba imi na’in rua tuba metin nafatin ho FRETILIN, halo moris no hamorin nafatin naran FRETILIN. Ho Kamarada sira nia hotu nia serbisu halo moris no hamorin FRETILIN iha povu Maubere nia fuan.”
Hafoin simu tiha sertifikadu rekoñesimentu no kartaun membru nian, membru CCF Segunda Jerasaun Lere Anan Timur hateten, “Ho honra boot tebes, hau bele fila-fali mai hamutuk ho kamarada sira hotu, halibur hamutuk iha uma lulik ida ne’e, sede Komite Central FRETILIN.
