Reportajen Adroaldo “Saretukau”
Peskizador Agrikultura ONG La’o Hamutuk, Mariano Ferreira hatete, Timor-Leste presiza uza di-di’ak fundu mina rai hodi diversifika ekonomia no investe maka’as iha seitor produtivu agrikultura, seitor indústria, kooperativa, inklui turizmu nomos seitor peska i pekuária. Aleinde ne’e, apoiu hodi dezenvolve mos joven sira nia aktividade iha agrikultura liu hosi apoiu tékniku, finasial no ekipamentu, nune’e bele sai fontes ba kria empregu no empregabilidade.
Nia dehan, hosi parte sosiedade sivíl, sira sempre halo advokasia hodi ko’alia ho Governu, Parlamentu Nasionál, Prezidente Repúblika no entidade relevante hotu oinsá uza fundu ne’e ho di-di’ak, nune’e bele dezenvolve ita nia seitor produtivu sira, liu-liu agrikultura ne’ebé hanesan fontes importante tebes, tanba ko’alia konabá agrikultura sempre sustentável no mina la’os fontes renovavel no tempu sei maran.
“Entaun ita so iha de’it mak osan 19 bilioens ne’ebé mak iha hela banku Federal, no ida ne’e mos se kada tinan ita kontinua foti 1 biliaun ba leten atu halo dezenvolvimentu ne’e mos la sustentável, entaun ita bele foti osan boot maibé oinsá tenki investe di-di’ak ba seitor agrikultura, seitor indústria, kooperativa sira, inklui turizmu nomos seitor peska i pekuária. Seitor hirak sei emprega ema barak iha ne’ebá,” dehan peskizador Agrikultura La’o Hamutuk, Mariano, iha ámbitu lansamentu bulletin média tour, iha Edifísiu Oxfam, Hudi-Laran, Kinta-feira 28/07.
Relasiona ho média tour ba munisípiu Baucau no Ainaro hatudu katak joven barak mak halo aktividade agrikultura ho susesu, no sei iha tan joven susesu seluk iha munisípiu seluk, tanba ne’e mak peskizador La’o Hamutuk ne’e husu ba governu atu investe iha seitor agrikultura liu-liu dezenvolve joven sira mak inisia ona sira nia aktividade agrikultura sira.
“Aktividade (agrikultura) hirak ne’e presiza apoiu, en termus finansiamentu, téknika nomos ekipamentu. No oinsá ita uza osan hosi mina ni-nian bele fasilita sira (joven) atu nune’e bele kria servisu ba sira, fo empregu ba sira, ho ida ne’e bele haluan sira nia servisu hanesan hakiak animal, kuda modo, halo to’os ka halo natar, halo aktividade kreativu sira, entaun sei emrprega ema barak iha ne’ebá, entaun joven sira remata, tantu hosi sekundária ka universitáriu, sira mos bele inklui iha servisu sira ne’e,” Mariano sujere ba governu.
Nia salienta, se ita depende de’it ba fundu mina hodi la dezenvolve seitor produtivu sira mak ita sei lakon. Tanba tuir nia, mais ou menus tinan 2030 ba leten fundu mina rai ne’e sei hotu, nune’e ita sei hasoru problema boot ho dezenvolvimentu, tanba la iha ona osan hodi sustenta ita ba hala’o dezenvolvimentu iha rai laran, nomos sei la importa tan produtu sira hosi rai li’ur hanesan fos no ai-han seluk ne’ebé ita sei importa.
“Entaun ne’e oportunidade katak ita oinsá atu investe ona ba ita nia seitor sira ne’ebé mak tuir los, nu’udar seitor ne’ebé alein de fo servisu nomos bele hadi’a povu nia ekonomia. Entaun ami hanoin através hosi koligasaun ida ne’e, deskobrimentu ne’ebé média tour sira halo, nafatin fo hanoin ba ukun na’in sira, ba Parlamentu, ba Governu liu-liu Parlamentu ho Governu tanba Governu mak kria programa sira, Parlamentu mak diskuti, aumenta no hadi’a buat balu, entaun tenki ona fo prioridade ba seitor sira produtivu ni-nian tanba ema barak nia moris depende iha ne’ebá.” Dehan Mariano.
