Reportazen Francisco JDA
Relasiona ho impase politika ne’ebe akontese dadaun iha Timor Leste, halo sai diskusaun boot iha publiku. Iha loron nasional Veteranu nian, Xefe Estado Maior Jeneral FALINTIL-Forsa Defeza Timor-Leste [FFDTL], Major Jeneral Lere Anan Timur ba jornalista sira hateten, eleisaun antesipada ne’e povu baruk ona, Timor ida kiik, kiak foin ukun an tinan tolu eleisaun dala tolu ida ne’e la bele.
“Situasaun politika mak hanesan ne’e ona ne’e ami labele interven agora, la hatene kuando eleisaun antesipada situasaun hakmatek ka lae, forsa armada no policia komprende ninia dever, ninia misaun seguranca, estabilidade ba ita nia rain, se mak viola seguranca ho estabilidade pasensia tenke simu konsekuensia, laos ha’u mak responsabiliza, politiku sira mak sei responsabiliza”, tenik Major Jeneral Lere Anan Timur, iha CCD 02/03.
Major Jeneral Lere Anan Timur hateten situasaun tenke estavel, Policia no Forcas Armadas tenke mantein ninia pozisaun nu’udar lutu ba nasaun, la bele sira mak sobu fali lutu ne’e, esencial kuando Forsa Armada ho Policia hakmatek ona, nasaun hakmatek ona
“Lider sira ne’e hanoin katak sira mos tenke manan konsekuensia, kestaun moral buat sira ne’e hotu sira tenke halo, oinsa para resolve situasaun ida ne’e, dalaruma ha’u temi beibeik sira nia naran Ramos Horta, Mari no Xanan. Ami nia destinu naruk ne’e, oituan mak moris, rihun ba rihun mak mate , ne’e mak imi nain tolu moris ne’e, ami temi nafatin imi nia naran, atu halo oinsa para nasaun ne’e lao ba oin”, tenik Lere Anan Timur.
