Reportajen Joselina dos Santos
United Nations Educational Scientific and Cultural Organization (UNESCO), iha Timor-Leste servisu hamutuk ho Konsellu Imprensa no media sira, hodi koalia kona-ba kódigu étika jornalistika iha era Digitál nian, oinsa atu bele kombate informasaun falsa ka HOAX no kontribui ba dezenvolvimentu nasional.
Reprezentante UNESCO iha Timor-Leste, Adelina Lourdes hateten UNESCO hanesan ajénsia uniaun ida ho nia mandatu fó apoiu ba edukasaun, Siénsia no Kultura no mos komunikasaun, atu promove liberdade Imprensa no liberdade espresaun, seguransa ba jornalista sira no mos asesu ba informasaun. UNESCO nia Servisu atu hametin liberdade independen no jornalistika media imprime, eletroniku no online, tanba dezenvolvimentu media ne’e bele haforsa liberdade expresaun no mos kontribui ba paz sustenbilidade no direitus umanus.
UNESCO servisu hamutuk ho media iha tinan 2002 wainhira asensiamentu Line skip dezenvolvimentu media iha Timor-Leste, iha tinan 2017 servisu hamutuk ho Konsellu Imprensa Asosiasaun Jornalizmu no mos Departamnetu Komunikasaun Sosial Universidade Nasional Timor Lorosa’e (UNTL), hodi fornese treinamentu.
“Treinamentu hirak ne’e fó benefisiu ba autores media liu husi ema rihun ida inklui jornalista, juventude sira no mos estudante sira hamutuk ema na’in atus lima” dehan Reprezentante UNESCO iha Timor-Leste Adelina Lourdes iha Nia Diskursu Eventu Balibo V, Postu-Administrativu Balibo, Munisipiu Bobonaro, 15/10.
Nia informa Lansamentu loron nasional liberdade imprensa no komemorasaun Trajédia Balibo V, ho apoiu UNESCO Konsellu Imprensa iha Forum Nasional Editórial hodi diskute kona-ba kódigu étika jornalistika iha hera Digitál no mos nia obstakulu oinsá atu kombate informasaun HOAX iha Timor-Leste
UNESCO iha pápel ida hodi konekta Konsellu Imprensa kona-ba oinsá kontra Disinformasaun no harii aliansa Check Fakta nasionál, liu-liu hodi haree ba iha eleisaun parlamentar ne’ebe sei akontese iha tinan oin, espera iha forum nasional editórial ida ne’e hamosu rezultadu diak ba kódigu étika jornalistiku iha era digital nian.
