Reportajen Joselina dos Santos
Komemorasaun Trajédia Balibo V, Loron Nasional Liberdade Imprensa ba 47, Konsellu Imprensa (KI), garante ba independénsia editorial no órgaun komunikasaun sosiál bazeia ba mandatu rua, atu apoia organizasaun asosiasaun atu halo kapasitasaun téknika kapasitasaun profisionál no kapasitasaun intelektuál iha rai laran.
Iha Komemorasaun ne’e, Prezidente Konsellu Imprensa (KI), Vírgilio Guterres “Lamukan” hatete, Konsellu Imprensa mosu iha tinan 2016 ho mandatu legal rua ne’ebe importante primeiru atu garante independensia editórial orgaun komunikasaun sosial husi intervensaun poder politika no poder ekonomika nian, segundu atu garante publiku nia direitu hodi hetan informasaun ida ne’ebe loos, Husi mandatu rua ne’e ita deskreve atividade no programa sira seluk ne’ebe Konsellu Imprensa hala’o ona.
“Timor-Leste hahú restaura nia independensia iha milénio foun ne’ebe internet komesa hahú sai nesesidade basika ba ita nia sosiedade, entaun Konsellu Imprensa mosu iha periode ne’ebe dezafiu ba orgaun komunikasaun sosial no mos ba meius komunikasaun sosial komesa aumenta, ida ne’e ita bele haree husi definisaun kona-ba limitasaun ba liberdade nian”, Dehan, Prezidente Konsellu Imprensa (KI), Vírgilio Guterres “Lamukan” iha selebrasaun Balibo V, Postu-Administrativu Balibo, Munisipiu Bobonaro, 15/10.
Prezidente KI hatutan antes ne’e iha era internet no digital ema koalia kona-ba limitasaun, tanba ne’e limitasaun ba liberdade Imprensa ka bandu ema atu harii jornal ou bandu ema atu halo sujestaun, entaun ida ne’e hanesan limitasaun liberdade Imprensa.
“Ita hotu iha limitaba internet atu asesu ba informasaun, tanba karik internet laiha, ita labele asesu ba informasaun ho lalais no mos media sira labele halo live Streaming, entaun nia paradigma ne’e oin seluk tanba ne’e, ami identifika katak lei komunikasaun sosial ne’ebe iha, laiha parte ida koalia kona-ba plataforma digital, tanba iha momentu ne’eba ita halo esplorasaun ba lei komunikasaun sosial plataforma digital seidauk mosu, entaun koalia de’it kona-ba media eletrónika ho media imprime refere de’it ba media rua”, nia informa.
